პანკისის სპეცოპერაციის შედეგად მოკლული თემირლან მაჩალიკაშვილის მამა, მალხაზ მაჩალიკაშვილი თბილისში, პარლამენტის შენობის წინ კვლავ აქციას მართავს. დღეს, 25 ნოემბერს, შვილის დაბადების დღეზე მალხაზ მაჩალიკაშვილი სახელმწიფო თანამდებობის პირებისგან მისი შვილის მკვლელობაში მონაწილე პირების დასჯას ითხოვს.

"დღეს თემირლანი 20 წლის გახდებოდა, მაგრამ არ აცალეს", — თქვა მაჩალიკაშვილმა აქციაზე.

აქციაზე მაჩალიკაშვილთან ერთად არის ზაზა სარალიძე, ხორავას ქუჩაზე მოკლული დათო სარალიძის მამა. ისიც შვილის მკვლელობაში მონაწილე პირების დასჯას ითხოვს.

"ჩემს შვილს ოცნებები ოცნებამ წაართვა... დღეს გამოვდივარ და თამამად ვამბობ, ძირს მკვლელი ხელისუფლება... მკვლელების ადგილი ციხეშია", — აღნიშნა თემირლან მაჩალიკაშვილის დედამ.

ადევნეთ On.ge-ს პირდაპირ ეთერს თვალს აქციიდან.

სპეცოპერაცია პანკისში

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა.

რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს.

სახელმწიფო უსაფრთხოების სამსახურის ინფორმაციით, 19 წლის თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო და რამდენიმე დღეში საავადმყოფოში გარდაიცვალა. მაჩალიკაშვილის ოჯახი სუს-ის ვერსიას არ იზიარებს და ამბობს, რომ თემირლანი მოკლეს. ოჯახის წევრები ამბობენ, რომ სპეცოპერაციის ღამეს მათთან სუს-ის უფროსის მაშინდელი მოადგილე სოსო გოგაშვილი იყო ჩასული და ემუქრებოდა.

გოგაშვილი 21 აგვისტოს მოულოდნელად თანამდებობიდან გადადგა.