საქართველოს სახელმწიფო უსაფრთხოების სამსახურის უფროსის პირველმა მოადგილემ, იოსებ გოგაშვილმა თანამდებობა დატოვა. გოგაშვილის მიერ თანამდებობის დატოვება On.ge-ს უწყებაში დაუდასტურეს. მიზეზი ჯერჯერობით უცნობია.

ამის შესახებ ინფორმაცია თავდაპირველად imedinews-მა გაავრცელა. იოსებ გოგაშვილი სუს-ის ხელმძღვანელის მოადგილედ 2015 წლის აგვისტოში დაინიშნა.

იოსებ გოგაშვილის სახელი დაუკავშირდა რამდენიმე თვის წინ პანკისში ჩატარებულ სპეცოპერაციას, რომლის შედეგად თემირლან მაჩალიკაშვილი გარდაიცვალა. მისი მშობლები ამბობენ, რომ სპეცოპერაციის ღამეს მათთან გოგაშვილი ჩავიდა და ემუქრებოდა. ამის შესახებ მათ რუსთავი 2-ს განუცხადეს. მათი თქმით, გოგაშვილი მათთან თემირლან მაჩალიკაშვილის დაჭრის შემდეგ ჩავიდა.

"თითის ქნევით მითხრა, გახსოვს სალოსზე [ბერი გაბრიელ სალოსის ქუჩა] რა მოხდა, გახსოვს მანდ სპეცრაზმელი რომ მოკლესო. სპეცრაზმელი თუ მოკლეს მე ან ჩვენ რა შუაში ვარ-მეთქი, ვკითხე. დამუქრებით მითხრა, თქვენ ძალიან კარგად იცითო", - ამბობს მაჩალიკაშვილის დედა, მედეა მაჩალიკაშვილი.

იოსებ გოგაშვილმა რუსთავი 2-თან სატელეფონო ინტერვიუში მაჩალიკაშვილების სიტყვები უარყო და თქვა, რომ სპეცოპერაციის ღამეს დუისში არ ჩასულა და სახლში იყო.

გაიგეთ მეტი ისნის სპეცოპერაციაზე.