კრიპტოვალუტა ბოლო რამდენიმე წელია ყველაზე აქტუალური თემაა. მისი გააქტიურების თანავე ეკონომისტების ნაწილი ამტკიცებდა, რომ ციფრული ვალუტის ფასის მატება დროებითი იყო და ის მალე ბუშტივით გასკდებოდა. 2017 წლის ბოლოსთვის 1 ბიტკოინის ფასი $20 000-ს უტოლდებოდა, დღეს კი $3600 ღირს.

ჯერ კიდევ რთული სათქმელია კრიპტოვალუტის ბაზარი მართლა ბუშტივით გასკდება თუ განვითრების გზას დაუბრუნდება, თუმცა ტენდენცია აჩვენებს, რომ ციფრულ ფულს პრობლემები აქვს.

კრიპტოვალუტის საბაზრო კაპიტალიზაცია 2018 წლის იანვარში $819 მილიარდი იყო, ახლა კი მისი მთლიანი ღირებულება $139 მილიარდამდეა. ცნობისთვის, მაკდონალდსის მთლიანი ღირებულება $140 მილიარდია.

ფოტოზე ნაჩვენებია კრიპტო-ვალუტების საბაზრო კაპიტალიზაცია

ფოტოზე ნაჩვენებია კრიპტო-ვალუტების საბაზრო კაპიტალიზაცია

ფოტო: The next web

მაკდონალდსთან შედარება ამ შემთხვევაში თითიდან გამოწოვილია და მხოლოდ კრიპტო ვალუტის პრობლემების წარმოსაჩენად გამოდგება.

ამ წუთისთვის ყველაზე დიდი საბაზრო კაპიტალიზაცია $75 მილიარდით ბიტკოინს აქვს, მეორე ადგილზე Ripple XRP არის $16.5 მილიარდით, ხოლო მესამე ადგილზე ეთირიუმია $12 მილიარდის კაპიტალიზაციით. მათ გარდა, სიაში კიდევ 2050 ინდექსირებული კრიპტოვალუტაა, თუმცა მათი ღირებულება ბიტკოინთან, რიპლთან და ეთირიუმთან ახლოსაც ვერ მიდის.

აღსანიშნავია ისიც, რომ ეთირიუმის ყველა აპლიკაციას დღეში 15 000-ზე ნაკლები მომხმარებელი ჰყავს, რაც შესაძლოა მისდამი ინტერესის კლებითაც იყოს გამოწვეული. შედარებისთვის, Uber-ს თვეში 75 მილიონზე მეტი აქტიური მომხმარებელი ჰყავს, რაც დღეში 2.5 მილიონს უდრის. ინსტაგრამს დღეში 500 მილიონზე მეტი ადამიანი სტუმრობს, ხოლო მაკდონალდსში ყოველდღიურად 65 მილიონი ადამიანი იკვებება.

ამ შედარების მოყვანა, ეკონომისტების აზრით, მნიშვნელოვანია იმის საჩვენებლად, თუ რამდენად არასტაბილურია კრიპტოვალუტის ბაზარი.

ბოლოს კი, აუცილებელია აღვნიშნოთ, რომ უახლოეს პერიოდში მოსალოდნელია ციფრული ვალუტის ფასის ზრდა, რაც მის საერთო საბაზრო კაპიტალიზაციას ისევ გაზრდის, თუმცა რამდენად შეძლებს სტაბილურობის შენარჩუნებას, ამის დადგენა შეუძლებელია.