სამართლიან არჩევნების ინფორმაციით, არჩევნების მეორე ტურამდე სხვადასხვა მუნიციპალიტეტებში საჯარო მოხელეებსა და დასაქმებულ პირებს აიძულებენ, მმართველი გუნდის მიერ მხარდაჭერილ კანდიდატს, სალომე ზურაბიშვილს მისცენ ხმა. ორგანიზაციის ინფორმაციით, ზურაბიშვილის მხარდამჭერები ცდილობენ, გაერთიანებული ოპოზიციის საპრეზიდენტო კანდიდატის, გრიგოლ ვაშაძის მომხრეები არჩევნებზე არ მივიდნენ.

ორგანიზაციის მიერ გამოვლენილი დარღვევები

სამართლიანი არჩევნები განცხადებაში ამომრჩევლების იძულების კონკრეტულ შემთხვევებზე წერს. არასამთავრობო ორგანიზაციის ცნობით, მუნიციპალიტეტების ხელმძღვანელი თანამდებობის პირები საჯარო მოხელეებს შეხვედრებზე აფრთხილებენ, რომ თუ სალომე ზურაბიშვილს არ დაუჭერენ მხარს, ისინი სამსახურს დაკარგავენ და ქვეყანაში არეულობა და დაპირისპირება დაიწყება.

• რამდენიმე მუნიციპალიტეტში გუბერნატორების მერებთან შეხვედრები და შს მინისტრის ვიზიტი შესაძლოა, ზეწოლასა და ამომრჩევლებზე ზემოქმედებასთან იყოს დაკავშირებული;
• ახალციხეში ერთ-ერთი ბაგა-ბაღის თანამშრომლებს სამსახურიდან გათავისუფლების მოთხოვნით განცხადებები დააწერინეს და გააფრთხილეს, რომ თუ სალომე ზურაბიშვილი ვერ გაიმარჯვებს, ეს განცხადებები ძალაში შევა;
• ორგანიზაციის ცნობით, სამსახურიდან გათავისუფლებით გურჯაანისა და ქარელის მუნიციპალიტეტებშიც დაემუქნენ; შიდა ქართლში გამართულ შეხვედრებზე ხელმძღვანელები თანამშრომლებს ეუბნებიან, რომ თუ არჩევნებში გრიგოლ ვაშაძე გაიმარჯვებს, ომი და არეულობა დაიწყება და ამ ინფორმაციის ახლობლებთან გავრცელებას სთხოვენ;
• განცხადებაში წერია, რომ თბილისში, ხაშურსა და ზუგდიდში ზეწოლას კერძო სექტორში დასაქმებულ პირებზეც ახდენენ. კერძოდ, ბიზნესის მფლობელები ვაშაძის მხარდამჭერი დასაქმებულებისგან პირადობის დამადასტურებელი დოკუმენტების მათთვის გადაცემას მოითხოვენ;
• მარნეულში ერთ-ერთ მოქალაქეს პოლიციის თანამშრომელი ოჯახის წევრის დაპატიმრებითა და მცირე ბიზნესის დაჯარიმებით დაემუქრა, თუ ვაშაძის მხარდაჭერას არ შეწყვეტდა;
• გორის მუნიციპალიტეტში მოქალაქეებს უცნობი პირები უკავშირდებიან და ამომრჩეველს პირადი მონაცემების დაზუსტების გზით უქმნიან იმ განცდას, რომ მათთვის ხალხის პერსონალური ინფორმაცია ცნობილია;
• ბათუმში ერთ-ერთ ოჯახში ქართული ოცნების კოორდინატორებმა აღნიშნეს, რომ მისამართზე ჩაწერილი პირები პირველ ტურზე არ მისულან; ორგანიზაცია წერს, რომ აღნიშნული ინფორმაცია კონფიდენციალურია და გაუგებარია, თუ რა ხერხებით აღმოჩნდა ის გარეშე პირების ხელში.

სამართლიანი არჩევნები მიიჩნევს, რომ ამგვარი ტენდენციის გაგრძელების შემთხვევაში შესაძლოა, არჩევნების მეორე ტურის ლეგიტიმაციას ჩრდილი მიადგეს. ორგანიზაცია მოუწოდებს ხელისუფლებას, საჯაროდ დაგმონ ზეწოლის ფაქტები. ამასთან, ისინი მიიჩნევენ, რომ ადგილობრივი თვითმმართველობის ხელმძღვანელმა პირებმა ზეწოლისა და იძულების პრაქტიკა უნდა აღკვეთონ.

სამართლიანი არჩევნები კერძო სექტორის წარმომადგენლებს მიმართავს, რომ პირადობის დამადასტურებელი დოკუმენტები არ ჩამოართვან, რადგან ეს სისხლის სამართლის დანაშაულია. ორგანიზაცია მმართველი პარტიის აქტივისტებსაც მოუწოდებს, უარი თქვან უკანონო დავალებების შესრულებაზე.