ტელეკომპანია რუსთავი 2-ის ინფორმაციით, ქართული ოცნების პიარტექნოლოგი ლაშა ნაცვლიშვილი საჭეს არაფხიზელი მართავდა, თუმცა, პატრულმა არ დააჯარიმა. 18 ნოემბრის გამოშვებაში, გადაცემა P.S.-მა გააშუქა საპატრულო პოლიციის სამხრე კამერით გადაღებული ვიდეომასალა.

მათივე ცნობით, ვიდეო 2017 წლის ივლისში, თბილისში, ჭავჭავაძის გამზირზე გადაიღეს. ვიდეოში, სადაც სავარაუდოდ, ლაშა ნაცვლიშვილი ჩანს, პატრულის თანამშრომლის საუბარი ისმის. საუბრიდან ირკვევა, რომ იგი ცდილობდა მძღოლის გაჩერებას, რომელმაც, მისივე თქმით, საავარიო სიტუაცია რამდენჯერმე შექმნა.

P.S.-ის ცნობით, პოლიციელმა ხელმძღვანელობას მიაწოდა ინფორმაცია ამ ფაქტის შესახებ, მას მისცეს ბრძანება, რომ სასწრაფოდ გაეთავისუფლებინა ლაშა ნაცვლიშვილი და არც კი ეფიქრა მის ხელმეორედ გაჩერებაზე, მითუფრო, დაჯარიმებაზე.

ამ თემაზე შინაგან საქმეთა სამინისტროში On.ge-ს განუცხადეს, რომ გენერალურმა ინსპექციამ, სიუჟეტის გასვლისთანავე დაიწყო სამსახურებრივი მოკვლევა. შსს-ში არ პასუხობენ კითხვას, დაჯარიმდა თუ არა ადგილზე, შესაძლო სამართალდამრღვევი პირი.

უწყება ირწმუნება, რომ ფაქტის დადასტურების შემთხვევაში, დადგება შესაძლო სამართალდარღვევის ჩამდენი ყველა პირის პასუხისმგებლობის საკითხი.

ლაშა ნაცვლიშვილი კურიერის სიუჯეტს ფეისბუქის გვერდზე გამოეხმაურა. ის ადასტურებს, რომ საჭესთან "ზომაზე მეტად ნასვამი" იჯდა, შედეგად კი საპატრულო პოლიციის თანამშრომელმა შინ მიაცილა და ყველაფერი მშვიდობით დასრულდა.

ლაშა ნაცვლიშვილი 2001-2003 წლებში საქართველოს სახელმწიფო უშიშროების მინისტრის მოადგილე იყო. 2012-2013 წლებში კი საქართველოს გენერალური პროკურორის მოადგილე.