პარლამენტის დეპუტატის ქართული ოცნებიდან ეკა ბესელიას თქმით, სალომე ზურაბიშვილისა და ქართული ოცნების ერთიანობის ხაზგასმა მეორე ტურის ახალი ბილბორდების მთავარი გზავნილია.

"ეს არის ერთიანობის ხაზგასმა იმისათვის, რომ მობილიზება მოხდეს ყველა იმ ჩვენი ამომრჩევლის, რომელიც პირველ ტურზე ვერ მოვიდა ან არ მოვიდა", — განაცხადა ბესელიამ ჟურნალისტებთან.

15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი, პარლამენტის თავმჯდომარე, ირაკლი კობახიძე და პრემიერ-მინისტრი, მამუკა ბახტაძე არიან გამოსახული.

პარტია ქართული ოცნება ბილბორდებზე ლიდერების გამოჩენას პარტიის ახალი სტრატეგიით ხსნის. პარტიაში აცხადებენ, რომ მეორე ტურის კამპანიის ფარგლებში განახლდა სალომე ზურაბიშვილის საარჩევნო სლოგანიც.

საქართველოს პრემიერ-მინისტრის, მამუკა ბახტაძის განცხადებით, არაფერია განსაკუთრებული, რომ ქართული ოცნება სალომე ზურაბიშვილის საარჩევნო კამპანიაშია ჩართული, მათ შორის ბიძინა ივანიშვილიც.

"თქვენ რა მიგაჩნიათ განსაკუთრებულად იმაში, რომ ქართული ოცნება, როგორც პირველ ტურში, ასევე მეორე ტურში, მხარს უჭერს სალომე ზურაბიშვილს და ჩართულია წინასაარჩევნო პროცესებში, მათ შორის მისი დამფუძნებელი, ბიძინა ივანიშვილიც. სალომე ზურაბიშვილის ბანერები არ შეგიმჩნევიათ სხვაგან? არის ახალი ბანერები, არის სალომე ზურაბიშვილის ბანერებიც", — განაცხადა მამუკა ბახტაძემ.

საფარის ხელმძღვანელი, ბაია პატარაია მიიჩნევს, რომ სალომე ზურაბიშვილის ბილბორდებზე ქართული ოცნების კაცი ლიდერების გამოჩენა "შოკისმომგვრელი სექსისზმი და სიბეცეა".

პატარაიას თქმით, ზურაბიშვილს სახე წაართვეს და მისი სახელი კაცებმა მიიტაცეს, რადგან ჰგონიათ, რომ სალომე არ ვარგა პოლიტიკოსად და თვითონ უკეთესები არიან. ეს კი, მისივე თქმით, "ყველა ქალის შეურაცხყოფაა და არა მხოლოდ სალომესი".