თბილისის მერს, კახა კალაძეს მიაჩნია, რომ არჩევნების მეორე ტურის სამუშაო დღეს დანიშვნა უცხოეთში მცხოვრებ ქართველებს ხელს არ შეუშლის. კალაძემ პარალელი 2012 წელთან გაავლო, როცა საპრეზიდენტო არჩევნები ორშაბათ დღეს ჩატარდა.

"ვისაც სურვილი აქვს მიიღოს არჩევნებში მონაწილეობა, მათ ეს არ გაუჭირდებათ, როგორც არ გაუჭირდათ 2012 წელს", — განაცხადა კალაძემ ჟურნალისტებთან საუბრისას.

საქართველოს ცენტრალურ საარჩევნო კომისიაში დღეს, 14 ნოემბერს, 13 საათზე დაანონსებული სხდომა 19 საათამდე გადაიდო. ამ სხდომაზე უნდა გამოცხადებულიყო საპრეზიდენტო არჩევნების პირველი ტურის შედეგები და მეორე ტურის თარიღი.

არასამთავრობო ორგანიზაციების განცხადებით, დღევანდელი სხდომის დღის წესრიგით განსაზღვრულია, რომ ადმინისტრაცია შედეგების შეჯამებასთან ერთად კენჭისყრის თარიღსაც დანიშნავს, რაც იმას ნიშნავს, რომ არჩევნების მეორე ტურის კენჭისყრის დღედ ოთხშაბათი, 28 ნოემბერი განისაზღვრება.

გაერთიანებული ოპოზიციის ერთ-ერთი ლიდერის, გიორგი ვაშაძის თქმით, არჩევნების სამუშაო დღეს დანიშვნა რამდენიმე მიზეზით სურთ:

  • უცხო ქვეყანაში რეგისტრირებულმა მოქალაქეებმა ვერ მისცენ ხმა გრიგოლ ვაშაძეს;
  • არჩევნებზე მივიდნენ საჯარო სამსახურში დასაქმებული ადამიანები და კერძო სექტორის — არა.

კალაძის მსგავს პოზიციაზეა პარლამენტის თავმჯდომარე, ირაკლი კობახიძეც. მას არ ჰგონია, რომ არჩევნების თარიღმა ამომრჩეველთა აქტივობაზე გავლენა ჰქონდეს. კობახიძის თქმით, არჩევნების ორშაბათ დღეს დანიშვნას ამომრჩევლისთვის ხელი არც 2012 წელს შეუშლია.