გაერთიანებული ოპოზიციის ლიდერი ძალა ერთობაშიადან გიორგი ვაშაძე ამბობს, რომ ცენტრალური საარჩევნო კომისია ქართული ოცნების დავალებების შესრულებით თაღლითურ ორგანიზაციად ჩამოყალიბდა. ამის შესახებ ვაშაძემ ცესკოს იმ სხდომის გადადების შემდეგ განაცხადა, რომელზეც საპრეზიდენტო არჩევნების მეორე ტური უნდა გამოცხადებულიყო.

ვაშაძის არგუმენტებით, არჩევნების სამუშაო დღეს დანიშვნა რამდენიმე მიზეზით სურთ:

  • უცხო ქვეყანაში რეგისტრირებულმა მოქალაქეებმა ვერ მისცენ ხმა გრიგოლ ვაშაძეს;
  • არჩევნებზე მივიდნენ საჯარო სამსახურში დასაქმებული ადამიანები და კერძო სექტორის — არა.

"გამარჯვებას ვერ გამოგვტაცებენ ხელიდან ამ თაღლითური სქემებით", — განაცხადა ვაშაძემ.

საქართველოს ცენტრალურ საარჩევნო კომისიაში დღეს, 14 ნოემბერს, 13 საათზე დაანონსებული სხდომა 19 საათამდე გადაიდო. ამ სხდომაზე უნდა გამოცხადებულიყო საპრეზიდენტო არჩევნების პირველი ტურის შედეგები და მეორე ტურის თარიღი.

საარჩევნო კომისიაში აღნიშნეს, სხდომის გადადება პროცედურულ საკითხებს უკავშირდება.

არასამთავრობო ორგანიზაციების განცხადებით, დღევანდელი სხდომის დღის წესრიგით განსაზღვრულია, რომ ადმინისტრაცია შედეგების შეჯამებასთან ერთად კენჭისყრის თარიღსაც დანიშნავს, რაც იმას ნიშნავს, რომ არჩევნების მეორე ტურის კენჭისყრის დღედ ოთხშაბათი, 28 ნოემბერი განისაზღვრება.