მმართველი პარტიის მიერ მხარდაჭერილმა საპრეზიდენტო კანდიდატმა, სალომე ზურაბიშვილმა პირველი ტურის შემდეგ 1 750 000 ლარის შემოწირულობა მიიღო. ეს თითქმის რვაჯერ მეტია, ვიდრე გაერთიანებული ოპოზიციის კანდიდატის, გრიგოლ ვაშაძის შემოწირულობა, რომელიც 214 714 ლარი შეადგინა.

აღნიშნული შემოწირულობა პრეზიდენტობის კანდიდატებმა 29 ოქტომბრიდან 9 ნოემბრის ჩათვლით მიიღეს.

ზურაბიშვილის შემწირველებს შორის არის ქართული ოცნების დეპუტატის, ივლიანე წულაიას ცოლი, ქეთევან გოცაძე და და, თამარ წულაია. მათ ზურაბიშვილს 90 000 ლარი გადაურიცხეს.

პირველი ტურის საარჩევნო კამპანიის პერიოდში მმართველი გუნდის მიერ მხარდაჭერილმა საპრეზიდენტო კანდიდატმა, სალომე ზურაბიშვილმა 5 395 983,85 ლარის შემოწირულობა მიიღო.

გრიგოლ ვაშაძეს 5 485 ლარი შეწირა მისმა პრესსამსახურის თანამშრომელმა, სალომე სიგუამ. ამ უკანასკნელს წინა თვეში ვაშაძისთვის 3 000 ლარი აქვს გადარიცხული.

სიგუამ On.ge-ს თავის ხელფასის ოდენობის შესახებ ინფორმაცია გაუმხილა, თუმცა მისი გასაჯაროების სურვილი არ აქვს. პარტიის პრესსამსახურის მიერ საპრეზიდენტო კანდიდატისთვის ორ თვეში შეწირული თანხა თითქმის მისი ერთი წლის ხელფასია. მან, ასევე, განაცხადა, რომ საზღვარგარეთიდან ფულს უგზავნიან

"ვცხოვრობ მარტო, არ ვარჩენ არავის, შესაბამიდას, ეს ფინანსები, აბსოლუტურად, საკმარისია იმისთვის, რომ კანდიდატის, რომლისთვისაც ვმუშაობ და მიმაჩნია, რომ ქვეყნისთვის მნიშვნელოვანია მისი არჩევა, მის გამარჯვებაში შევიტანო ფინანსური წვლილი", — განაცადა სიგუამ.