საპარლამენტო უმცირესობის წევრი, ირმა ნადირაშვილი ამბობს, რომ ხელისუფლების მხარდაჭერილი კანდიდატი, სალომე ზურაბიშვილი ყოფილ ჯარისკაცებზე გაჟღერებული ბრალდებებით ჯარს უპირისპირდება. ასე გამოეხმაურა პარლამენტის დეპუტატი პრეზიდენტობის კანდიდატის მიერ გავრცელებულ ინფორმაციას მისი და მისი შვილების მიმართ ყოფილი ჯარისკაცების მხრიდან მუქარის შესახებ.

"ამ ხელისუფლების პრეზიდენტობის კანდიდატისგან დაუსაბუთებელი ბრალდებები წამოსროლა მხოლოდ ერთადერთი ნიშანი, რომ სალომე ზურაბიშვილი უპირისპირდება ჯარს, რომელიც მას მხარს არ უჭერს მოღალატეობრივი პოზიციის გამო", — აღნიშნა ნადირაშვილმა.

მმართველი გუნდის მიერ მხარდაჭერილი პრეზიდენტობის კანდიდატი სალომე ზურაბიშვილი აცხადებს, რომ მას და მის შვილებს მოკვლით ემუქრებიან. მისი თქმით, მუქარის ავტორები ნაციონალურ მოძრაობასთან არიან დაკავშირებულები. მან საგამოძიებო უწყებებს რეაგირებისთვის უკვე მიმართა, ხოლო არასამთავრობო სექტორს დახმარება სთხოვა. პრეზიდენტობის კანდიდატმა არასამთავრობოები შეხვედრაზეც მიიწვია, სადაც უშუალოდ გააცნობს მუქარასთან დაკავშირებულ საკითხებს.