ხელისუფლების მიერ მხარდაჭერილი კანდიდატი, სალომე ზურაბიშვილი ამბობს, რომ მას და მის შვილებს მოკვლით ემუქრებოდნენ. ამის შესახებ მან რამდენიმე წუთის წინ საგანგებო ბრიფინგზე ისაუბრა.

"სამივეს მიმართ გავრცელდა: შუბლს გაგიხვრიტავთ, თქვენს სისხლს დავლევ", — აღნიშნა ზურაბიშვილმა.

მისი თქმით, მუქარის შემცველი შეტყობინებები, რომელიც 9-11 ნოემბერს მიიღეს, რეალური საფრთხის შემცველია.

"ავტორები იდენტიფიცირებული არიან, ყოფილი სამხედროები არიან და თავისი სტატუსით ნაციონალურ მოძრაობას და მის მეთაურებს უკავშირდებიან", — განაცხადა ზურაბიშვილმა.

მან დახმარებისთვის არასამთავრობო ორგანიზაციებს მიმართა და შეახსენა, რომ პირველად მათ სხვა საკითხზე 11 ოქტომბერს მიმართა, თუმცა მათი მხრიდან რეაგირების გარეშე დარჩა.

ძალა ერთობაშიას შტაბის ხელმძღვანელი, გიორგი ვაშაძე ამბობს, რომ თუ რაიმე მიმოწერა არსებობს შესაბამისი უწყებები უნდა დაინტერესდნენ.

"ამ ქალბატონის მთავარი პრობლემა ის არის, რომ ის უპირისპირდება სამხედროებს და ზოგადად, შეიარაღებულ ძალებს", — აღნიშნა ვაშაძემ.

საქმეზე გამოძიება საქართველოს სისხლის სამართლის კოდექსის 284-ე მუხლის პირველი ნაწილითა და 151-ე მუხლის პირველი ნაწილით მიმდინარეობს. ეს მუხლები გულისხმობს კომპიუტერულ სისტემაში უნებართვო შეღწევასა და მუქარას.