საქართველოს სახალხო დამცველი, ნინო ლომჯარია შსს-ში გამოკითხვაზე დაიბარეს. ინფორმაცია On.ge-ს შინაგან საქმეთა სამინისტროს პრესსამსახურმა დაუდასტურა.

უწყების ცნობით, გამოკითხვაზე ლომჯარია იმ განცხადების გამო დაიბარეს, რომელშიც ამბობდა, რომ რამდენიმე თვის წინ შუბლის გახვრეტით ემუქრებოდნენ.

"მასთან გასაუბრების შემდეგ მიღებული იქნება გადაწყევტილება გამოძიების დაწყებასთან დაკავშირებით", — აცხადებენ უწყებაში.

დღეს, 12 ნოემბერს საპრეზიდენტო კანდიდატის, სალომე ზურაბიშვილის შემდეგ მუქარაზე სახალხო დამცველმა, ნინო ლომჯარიამ ისაუბრა. როგორც ომბუდსმენმა ფეისბუქანგარიშზე დაწერა, მას "შუბლის გახვრეტით" ემუქრებოდნენ და უცენზურო სიტყვებით მოიხსენიებდნენ.