ავსტრიაში რუსეთის სასარგებლოდ ჯაშუშობის ბრალდებით ავსტრიის სამხედრო ძალების გადამდგარი პოლკოვნიკი დააკავეს.

ავსტრიის საგარეო საქმეთა მინისტრმა, კარინ კნაისელმა, რომლის ქორწილშიც რუსეთის პრეზიდენტი, ვლადიმერ პუტინი იყო მიწვეული, მოსკოვში 2 დეკემბრის ვიზიტი გააუქმა. მან რუსეთის საელჩოს წარმომადგენლები თავისთან დაიბარა.

ადგილობრივი მედია წერს, რომ დაკავებული ძალიან ოსტატურად მუშაობდა და გადადგომის შემდეგ ავსტრიის სამხედრო შტაბში უმნიშვნელო თანამდებობას იკავებდა. მათივე თქმით, ჯაშუშობაში ბრალდებული ინფორმაციას აგროვებდა და ყოველ ორ კვირაში რუსეთის მხარის წარმომადგენელს სახელად "იურის" ეკონტაქტებოდა.

ქვეყნის თავდაცვის სამინისტროს წარმომადგენელმა, მარიო კუნასეკმა განაცხადა, რომ ინფორმაცია ბრალდებული ჯაშუშის შესახებ სხვა ევროპული სპეცსამსახურისგან რამდენიმე კვირის წინ გაჩნდა.

"ჯერ ვერ ვიტყვით ეს ერთი შემთხვევაა თუ არა", - განაცხადა მან.

რუსეთის საგარეო საქმეთა მინისტრმა, სერგეი ლავროვმა განაცხადა, რომ არასასიამოვნოდ გაკვირვებულია. ავსტრიაში რუსეთის საელჩომ მომხდარის შეფასებაზე უარი განაცხადა.

როგორც ქვეყნის კანცლერმა, სებასტიან კურცმა განაცხადა, პოლკოვნიკის წინააღმდეგ ბრალდება დადასტურდება. მან დაამატა, რომ სავარაუდო ჯაშუშმა მუშაობა 1990-იან წლებში დაიწყო და შესაძლოა ამ დრომდე აგრძელებდა.