საბერძნეთში გადაწყდა, რომ მართლმადიდებელი ეკლესიის სასულიერო პირებს სახელმწიფო მოხელის სტატუსი ჩამოერთვათ. აქედან გამომდინარე, ისინი სახელმწიფო ხელფასს ვეღარ მიიღებენ, წერს BBC.

შესაბამისი შეთანხმება, რომელიც სეკულარიზმისკენ გადადგმული კიდევ ერთი ნაბიჯია, ქვეყნის პრემიერ-მინისტრმა, ალექსის ციპრასმა და ელადის მართლმადიდებელი ეკლესიის მეთაურმა, იერონიმე მეორემ გააფორმეს.

ყოველწლიურად ეკლესიას სახელმწიფოსგან 200 მილიონი ევროს სუბსიდია ექნება და ის უცვლელი იქნება იმის და მიუხედავად გაიზრდება თუ შემცირდება სასულიერო პირების რაოდენობა.

როგორც BBC წერს, ეს შეთანხმება 10 ათასამდე სასულიერო პირსა და ეკლესიაში მომუშავეს შეეხება.

თავის მხრივ ეკლესიამ პირობა დადო, რომ ხელს არ შეუშლის ნაბიჯებს, რომლითაც სახელმწიფო "რელიგიურად ნეიტრალური" გახდება და უარს იტყვის, ქონებაზე, რომელიც სახელმწიფოს საკუთრებაში გადავიდა.

უძრავი ქონების გამო დავა 1952 წლიდან მიმდინარეობს. შეთანხმების თანახმად, მხარეები შექმნიამ საერთო ფონდს, რომელიც სადაო ქონებას უხელმძღვანელებს. შემოსავლები და დანახარჯები კი თანაბრად გადანაწილდება.

საბერძნეთში მართლმადიდებლობა სახელმწიფო რელიგიაა და ის დიდი როლს თამაშობს ქვეყნის განვითარებაში. მისი სტატუსი განმტკიცებულია ქვეყნის კონსტიტუციაში.

ხელისუფლებისა და ეკლესიის ხელმძღვანელებმა განაცხადეს, რომ სახელმწიფო გამოყოფს სუბსიდიებს, რომელიც ხელფასისთვის დაიხარჯება, თუმცა სასულიერო პირები სახელმწიფო მოხელის სტატუსს მაინც დაკარგავენ.

ეკონომიკური კრიზისის გამო საბერძნეთს ბოლო პერიოდში საერთაშორისო სესხების გამოყენება უწევდა, რაც სახელმწიფო სექტორის დანახარჯების მნიშვნელოვან შემცირებასაც გულისხმობს. 2015 წელს ქვეყანაში დასაქმებულთა 18 პროცენტი სახელმწიფო სექტორში მუშაობდა.