უკრაინელი ბიზნესმენი, ლეონიდ ჩერნოვეცკი პედოფილების მიმართ სასჯელის სახით ქიმიური კასტრაციის დაწესებას ითხოვს. შესაბამისი საკანონმდებლო წინადადებით მან პარლამენტს უკვე მიმართა.

ლეონიდ ჩერნოვეცკის მიერ წარდგენილ დოკუმენტაციაში ვკითხულობთ, რომ პედოფილის მიერ ჩადენილი დანაშაულისთვის, თავისუფლების აღკვეთასთან ერთად სასჯელის სახედ გამოყენებული უნდა იყოს ქიმიური კასტრაცია.

"ქიმიური კასტრაციის არსი მდგომარეობს იმაში, რომ დამნაშავის ორგანიზმში ხდება სპეციალური პრეპარატის შეყვანა, რომელიც ზემოქმედებას ახდენს მის სქესობრივ უნარზე - ითრგუნება მამაკაცის ჰორმონები, რომელსაც მივყავართ დამნაშავის სქესობრივი სურვილის სრულ ჩახშობამდე", — ვკითხულობთ საკანონმდებლო ინიციატივაში.

ბიზნესმენის პოზიციით, მისი მიზანია საზოგადოება პედოფილებისგან დაიცვას.

"პედოფილია არ არის დანაშაული, ეს არის მძიმე, ფსიქოლოგიური დაავადება. არანაირი საპატიმრო ვადა არ გადაწყვეტს ამ პრობლემას. პედოფილი ციხიდან გამოსვლის შემდეგ ასჯერ უფრო საშიში ხდება. და ეს ფაქტია", — ნათქვამია ჩერნოვეცკის მიერ პარლამენტში წარდგენილ დოკუმენტში.

ბიზნესმენი ამბობს, რომ რეგულაციების არარსებობის გამო მოსახლეობა პედოფილების ლინჩის წესით გასამართლებას ითხოვს-ხოლმე და არის შემთხვევები როცა წვავენ დამნაშავის სახლ-კარს.

"მიუხედავად იმისა, რომ მე გამაჩნია იურისტის უმაღლესი კვალიფიკაცია, თითქმის არ ვიცნობ საქართველოს კანონმდებლობას, ამიტომ თუ პარლამენტის ადმინისტრაცია დეტალებს დააზუსტებს მადლობელი ვიქნები. და რაც მთავარია მადლობელი იქნება ქვეყანა, რომელიც არ არის დაცული ამ საშინელი მოვლენისგან — პედოფილიისგან. გთხოვთ, არ დაგვიბრუნოთ კანონპროექტი "ტექნიკური მიზეზების" გამო და, თუ საჭირო გახდება, თქვენ თვითონ შეასწოროთ და მიიღოთ პარლამენტში", — წერს ჩერნოვეცკი.

მისი ინიციატივის მიხედვით, ქიმიური კასტრაცია უნდა იყოს სასჯელის სავალდებულო ზომა თავისუფლების აღკვეთასთან ერთად.

"ასევე პედოფილის მიმართ, რომელიც სასჯელს იხდის არ შეიძლება გამოყენებული იყოს შეწყალება, ამნისტია და პირობით ვადაზე ადრე გათავისუფლება", — წერს ბიზნესმენი.

ჩერნოვეცკის მიაჩნია, რომ აღნიშნული ინიციატივა ხელს შეუწყობს პედოფილების საზოგადობაში დაბრუნების უსაფრთხოებას.