საქართველოს პრეზიდენტი, გიორგი მარგველაშვილი აცხადებს, რომ რუსული პროპაგანდისტული მანქანა განვითარების აგრესიულ ფაზაშია და ამ პროაქტიურობას ადეკვატური და ორგანიზებული პასუხი სჭირდება. რუსული პროპაგანდისა და ჰიბრიდული მანქანის პრობლემაზე გიორგი მარგველაშვილმა საქართველოს თავდაცვისა და უსაფრთხოების კონფერენციაზე სიტყვით გამოსვლისას ისაუბრა.

პრეზიდენტმა თავისი გამოსვლა 90-იან წლებში არსებულ ჰიბრიდულ ომზე საუბრით დაიწყო და ხაზი გაუსვა, რომ რუსეთი პროპაგანდას საქართველოს დამოუკიდებლობის მოპოვების დღიდან იყენებს.

"ჰიბრიდული ომი საქართველოში 90-იანი წლების დასაწყისში მოისინჯა და მისი შესაძლებლობების ეფექტურად გამოყენების მიზნით დაიხვეწა. ჩვენ უნდა გვახსოვდეს, რომ 90-იან წლებში ახალ ქართულ სახელმწიფოში, რომელიც ფეხს იდგამდა და თავის იდენტობას თანამედროვე მსოფლიოში ადგენდა, სამხედრო ძალისა და ჰიბრიდული ომის მეშვეობით ევროატლანტიკური და დამოუკიდებელი არჩევანის შეჩერება ხდებოდა", — განაცხადა პრეზიდენტმა.

გიორგი მარგველაშვილის თქმით, საუბარი, რომ 2008 წელს რუსული სამხედრო აგრესია იყო ლეგიტიმური პასუხი საქართველოს ნატოში ინტეგრაციის მცდელობაზე, არასწორია. პრეზიდენტს მიაჩნია, რომ მსგავსი განცხადებები ერთგვარ ლოგიკურობას ანიჭებს საქართველოს ოკუპაციას, რაც დეზინფორმაციაა.

"ეს პროპაგანდისტული ტყუილი აქტიურად მუსირებდა და ამ ტყუილს ჩვენ ფარდა უნდა ავხადოთ. 2008 წელს ჩვენი ქვეყნის წინააღმდეგ ერთ-ერთი ტალღა იყო. ამ კონტექსტიდან კიდევ უფრო ნათლად გამოჩნდა ის მიზნები, რაც ამოძრავებდა და ამოძრავებს რუსულ სახელმწიფოს თავის მეზობლებთან. დღეს ჩვენ ვდგავართ იგივე მნიშვნელოვანი გამოწვევების წინაშე", — განაცხადა მარგველაშვილმა.

საქართველოს პრეზიდენტმა ხაზი გაუსვა, რომ რუსული პროპაგანდა, მხოლოდ ამ ქვეყნის მეზობლების პრობლემა არ არის და ნატოს წევრი ქვეყნების ტერიტორიაზეც გააქტიურებულია.

"ეს ის რეალობაა, რომელსაც ჩვენ ყველამ თვალი უნდა გავუსწოროთ და დავსახოთ სამომავლო და სამოქმედო გეგმები. მნიშვნელოვანია გავიაზროთ, რომ რუსული პროპაგანდისტული მანქანა თავისი განვითარების აგრესიულ ფაზაშია. როცა საბჭოთა კავშირის დემონტაჟზე ვფიქრობდით, ვერ წარმოვიდგენდით, რომ საბჭოთა კავშირის, ვარშავის ფაქტის დასრულებისა და კრახის შემდეგ, 25 წლის თავზე, საბჭოთა იმპერიის მმართველი ქვეყანა იქნებოდა პროაქტიური თავის პროპაგანდისტულ საქმიანობაში. ამ პროატიურობას სჭირდება ადეკვატური და ორგანიზებული პასუხი", — განაცხადა მარგველაშვილმა კონფერენციაზე სიტყვით გამოსვლის დროს.

ამავე თემაზე: