მოქალაქეთა საინიციატივო ჯგუფი ტელეკომპანია იმედის სარედაქციო პოლიტიკის გასაპროტესტებლად აქციას გეგმავს. პერფომანსი იმედის ოფისთან დღეს, 1-ელ ნოემბერს 17:00 საათზე არის დაგეგმილი.

აქციის ორგანიზატორები აცხადებენ, რომ გრიგოლ ვაშაძის წინააღმდეგ საგანგებო რეჟიმის გამოცხადებით ტელევიზიამ მხარი დაუჭირა სალომე ზურაბიშვილს, რაც რუსული ინტერესების გატარებად მიაჩნიათ. აქტივისტები აპირებენ ტელევიზიასთან ძველი, 90-იანი წლების ტელევიზორების მიტანას და ამ ფორმით იმის ხაზგასმას, რომ იმედი საბჭოთა კავშირის დროში "ჩარჩა".

ტელეკომპანია იმედი ვაშაძის წინააღმდეგ

მმართველი პარტიის და მათი მხარდაჭერილი საპრეზიდენტო კანდიდატის გარდა, მეორე ტურში გაერთიანებული ოპოზიციის კანდიდატს, გრიგოლ ვაშაძეს ბრძოლა გამოუცხადა ტელეკომპანია იმედმაც. ზურაბიშვილის ბრიფინგის შემდეგ ტელევიზიაში განაცხადეს, რომ არ დაუშვებენ რეჟიმის დაბრუნებას და მუშაობის საგანგებო რეჟიმზე გადადიან.

ტელეკომპანიის მიერ გავრცელებულ განცხადებაში წერია, რომ 2012 წლის არჩევნების შემდეგ პირველად ნაციონალური მოძრაობა ძალიან ახლოსაა იმასთან, რომ "წარსული ისევ რეალობად იქცეს".

"გრიგოლ ვაშაძე ამბობს, რომ შეიწყალებს მიხეილ სააკაშვილს, ძმებ ახალაიებს, ვანო მერაბიშვილს, მეგის ქარდავას და ყველას, ვისი სახელიც ნაციონალური მოძრაობის დანაშაულებრივ რეჟიმს უკავშირდება. ძალადობა, ბიზნესების წართმევა, ტელევიზიაში შეჭრა. სწორედ ამიტომ არის მიუღებელი იმედისთვის გრიგოლ ვაშაძის პრეზიდენტობა", — ნათქვამია განცხადებაში.