საქართველოს ახალგაზრდა იურისტთა ასოციაციამ 18 საათისთვის სულ 87 საჩივარი და 33 შენიშვნა დაწერა. ორგანიზაციის განცხადებით, სავარაუდოდ, საპრეზიდენტო არჩევნებზე ამომრჩევლის ნებას აკონტროლებენ, მოსყიდვას ცდილობენ. ამასთან, მათი ცნობით, დაფიქსირდა სხვა დარღვევებიც. საიას მიერ გავრცელებულ განცხადებაში წერია, რომ არსებული დარღვევების ნაწილი შესაძლოა, სისხლის სამართლის დანაშაულის ნიშნებს შეიცავდეს.

ამომრჩევლის ნების სავარაუდო კონტროლი

ორგანიზაციის ცნობით, ცხელ ხაზზე შესული შეტყობინებების მიხედვით, თბილისსა და რეგიონებში ამომრჩევლებს სალომე ზურაბიშვილის შტაბიდან უკავშირდებიან და ეკითხებიან, მიიღეს თუ არა არჩევნებში მონაწილეობა. მათი ცნობით, ორგანიზაციის დამკვირვებელს ნომერზე დარეკვის შემდეგ დაუდასტურეს, რომ ის სალომე ზურაბიშვილის შტაბს ეკუთვნოდა. საიას ინფორმაციით, შტაბში არ განმარტეს, რა იყო მოქალაქეებთან დაკავშირების მიზეზი და საიდან იცოდნენ მათი ნომრები.

სავარაუდო მოსყიდვა

• საიას ინფორმაციით, სამგორში, #56-ე უბანთან ეზოში მობილიზებული არიან კოორდინატორები, რომლებიც, სავარაუდოდ, ამომრჩევლის მობილიზებას სალომე ზურაბიშვილის მხარდასაჭერად ახდენენ.
• ვაკის #13 უბნის გარეთ დილიდან დგას ავტომანქანა, რომელსაც უბნიდან გასული ამომრჩეველი აკითხავს;
• მარნეულის #59 უბანზე ქართული ოცნებისა და ერთიანი ნაციონალური მოძრაობის 2 წევრი ფიზიკური დაპირისპირების გამო დააკავეს;
• დაუდგენელი პირები, რომლებიც აღრიცხავენ მისულ ამომრჩევლებს, სხვა უბნების ტერიტორიაზეც არიან.

დამკვირვებლის უბნიდან გაძევების მცდელობა

საია წერს, რომ მარნეულის #18 საუბნო საარჩევნო კომისიაში ნაკადის მომწესრიგებელმა ვადაგასული პირადობის მოწმობის მქონე ამომრჩევლები რამდენჯერმე შეუშვა უბანზე, შენიშვნა კი არ გაითვალისწინა. საიას ცნობით, დარღვევის ამსახველი ვიდეოს გადაღების შემდეგ საარჩევნო კომისიის თავმჯდომარე გაღიზიანდა და დამკვირვებელს განუცხადა, რომ მას საარჩევნო უბნიდან აძევებდა, საოლქო საარჩევნო კომისიის დაკავშირების შემდეგ კი ეს ქმედება გადაიფიქრა.

პროცედურული ხასიათის დარღვევები

• ბათუმის #14 უბანზე ამომრჩეველმა ნაკადის მომწესრიგებელს პირადობის მოწმობა არ წარუდგინა და ყვიროდა, რომ ხმის მიცემის უფლების შეზღუდვისთვის ჩაშლიდა კენჭისყრის პროცესს. ორგანიზაცია წერს, რომ კომისიამ მას უფლება მისცა, არჩევნებში მხოლოდ იმ პირობით მიეღო მონაწილეობა, რომ მხოლოდ რეგისტრატორი ნახავდა მის პირადობას, ამასთან, მარკირების პროცედურა არ გაუვლია;
• საიას ცნობით, ბათუმის #25 უბანზე მარკირების შემოწმების აპარატი გამართულად არ მუშაობდა;
• მარნეულის #49 უბანზე ამომრჩეველმა პირადობის მოწმობის გარეშე არჩევნებში მიიღო მონაწილეობა;
• ვაკის #50 უბანზე ამომრჩეველს მარკირება მთელ ხელზე აღენიშნებოდა, რაც იმით ახსნა, რომ მანდარინი მიირთვა და არჩევნებში მონაწილეობა დაბრკოლების გარეშე მიიღო;
• ნაძალადევის #49 უბნიდან კომისიამ ენმ-ს და არასამთავრობოს წარმომადგენლები გააძევა იმ მოტივით, რომ არეულობას ქმნიდნენ;
• სამგორის #6 უბანზე არასწორად განხორციელდა მარკირება;
• ხონის #6 უბანზე ჩანაწერთა წიგნი წინასწარ იყო შევსებული;
• ვაკის #13 საარჩევნო უბანზე ფიქსირდება 5 ფაქტი, როდესაც ამომრჩევლები არ არიან ამომრჩეველთა სიაში;
• ზუგდიდის #72 უბანზე ნაკადის მომწესრიგებელმა ვადაგასული პირადობის მოწმობით შემოუშვა მოქალაქე და რეგისტრატორმა შენიშნა;
• დიდუბის #5 საარჩევნო უბანზე კომისიამ არასამთავრობო ორგანიზაციის წევრი გააძევა, რადგან ის კაბინაში ამომრჩეველს შეყვა.