არჩევნებამდე სამი დღით ადრე უკრაინული საიტი აქვეყნებს აუდიოჩანაწერს, რომელშიც, სავარაუდოდ, ექს-პრეზიდენტი მიხეილ სააკაშვილი თავის ბიძას, თემურ ალასანიას ესაუბრება. საიტზე წერია, რომ ჩანაწერი მათ სანდო წყარომ მიაწოდა. ისინი, ასევე, წერენ, რომ მათ ბევრი ჩანაწერი აქვთ ეს უბრალოდ ერთ-ერთი მცირედი ფრაგმენტია.

ჩანაწერში, რომლის ავთენტურობაც ჯერ დადგენილი არ არის, სავარაუდოდ, თემურ ალასანია ამბობს, რომ მილიონს გადაუხდის სნაიპერს, რომელიც "ბიძინას მოკლავს". მოსაუბრეები, ასევე, რუსთავი 2-ის გენერალურ დირექტორს, ნიკა გვარამიასა და ეკა კვესიტაძეს ახსენებენ.

ჩანაწერს გამოეხმაურა ნიკა გვარამია. მისი თქმით, ეს არის სხვადასხვა საუბრიდან ამოღებული ფრაზები:

"დიდი ეჭვი მაქვს, რომ ბატონი ალასანიას ხმა ეს არ არის. შინაარსობრივადაც ბოდვაა, რაის ბატონი ალასანია მაძლევს მითითებას, საერთოდ არ ვიცნობ, მხოლოდ სამჯერ მყავს ნანახი, საერთო ნაცნობებთან, მხოლოდ გამარჯობის დონეზე ვიცნობ მეც და ეკა კვესიტაძეც".

ჩანაწერების ფალსიფიკაციაზე საუბრობს თემურ ალასანიაც. ის ამბობს, რომ საუბრის მსგავსი სტილი არ ახასიათებს და არც მისი ხმა ისმის.

"მკვლელობებს საერთოდ არ ვუკვეთავ და მით უმეტეს ტელეფონით და მეორე, ეტყობა ძალიან გაუჭირდათ და დამარცხება მათთვის გარდაუვალია", - ალასანიას განცხადებას რუსთავი 2 ავრცელებს.