გუშინ ბრიტანეთის ქალაქ ბლეკპულის პოლიციამ ვიდეო ჩანაწერის კადრები გამოაქვეყნა და მოსახლეობას ქურდის მოძებნა სთხოვა.

ხალხმა ქურდი ნაკლებად, თუმცა, აღნიშნულ კადრში სულ სხვა ადამიანი ამოიცნო და ის არც მეტი, არც ნაკლები როს გელერი, იგივე დევიდ შვიმერი იყო.

ერთი უწყინარი ხუმრობა, შვიმერისა და ქურდის მსგავსებაზე, საბოლოოდ დღის მთავარი თემა გახდა და მთელი მსოფლიო მოიცვა.

თემას სერიოზულად მიუდგა თავად ბლეკპულის პოლიციაც და ატვირთული ფოტოს კომენტარებში შვიმერის ალიბი დაადასტურეს - მსახიობი ქურდობის დროს ამერიკაში იყო, შესაბამისად ის რესტორანს ვერ გაძარცვავდა.

საბოლოოდ, შვიმერმა გადაწყვიტა ყველა ჭორი და ბრალდება საბოლოოდ გაექარწყლებინა და ტვიტერზე ვიდეო გამოაქვეყნა:

"ოფიცრებო, გეფიცებით ეს მე არ ვყოფილვარ. როგორც ხედავთ, ნიუ-იორკში ვიყავი. წარმატებებს გისურვებთ გამოძიებაში", - წერდა ხუმრობით მსახიობი.

ამიერიდან, პოლიციის ოფიცრებს მოუწევთ მოძებნონ ადამიანი, რომელიც გაჭრილი ვაშლივით ჰგავს დევიდ შვიმერს.