ქართული ოცნების თავმჯდომარის, ბიძინა ივანიშვილის განცხადებით, კანაფის წარმოებას იმიტომ დათანხმდა, რომ ექსპორტიდან მოგება მომხიბლავად ჯღერს.

"სამედიცინო და კოსმეტიკური მიმართულებით წარმოებას მხარს ვუჭერდი, მხოლოდ ერთადერთი მიზეზით ძალიან დიდი ხიბლია, რომ ნახევარი მილიარდი ან ორი მილიარდის ექსპორტი მოვახდინოთ", — განაცხადა ივანიშვილმა ჟურნალისტებთან ინტერვიუს დროს.

ივანიშვილმა ისაუბრა იმაზეც, თუ რამდენად მომგებიანია კანაფის კულტივაცია:

"რენტაბელობა ძალიან დიდი აქვს 500%-ზე მეტია და არის ძალიან დიდი ობიექტური გათვლები, რომ მილიარდი დოლარის და უფრო მეტის ექსპორტი განხორციელდეს 1-3 წელიწადში. მარიხუანას აწარმოებენ და ექსპორტზე გააქვთ - აშშ, ინგლისი, ისრაელი, საბერძნეთი, იტალია, უზბეკეთი."

ივანიშვილმა აღნიშნა ისიც, რომ მხოლოდ ექსპორტი არ არის მნიშვნელოვანი და გასათვალისწინებელია საზოგადოებისა და ეკლესიის რეაქცია. მისი თქმით, ეს გაითვალისწინეს კიდეც და კანონპროექტი შეაჩერეს.

მარიხუანის კულტივაციის კანონპროექტი

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე აიკრძალება არასამედიცინო მიზნით კანაფის კულტივაციაც.

საქართველოს პარლამენტმა კანაფის კონტროლის შესახებ კანონპროექტის განხილვა ორი თვით გადაავადა. შესაბამისი მოთხოვნით საქართველოს პარლამენტის ბიუროს ჯანდაცვისა და სოციალური დაცვისა და იურიდიულ საკითხთა კომიტეტებმა მიმართეს.

შინაგან საქმეთა მინისტრი, გიორგი გახარია მარიხუანის კულტივაციის კანონპროექტის განხილვის გადავადების მიზეზად კონსულტაციებს ასახელებს. მინისტრის თქმით, მუშაობა იქამდე გაგრძელდება, სანამ მხარეების პოზიციები არ დაახლოვდება.

საქართველოს მართლმადიდებელი ეკლესიის დაპირისპირების შემდეგ პარლამენტში კანონპროექტის უკან გაწვევაზეც მსჯელობდნენ.