ოფიციალური ვაშინგტონი რუსეთთან ბირთვული იარაღის შესახებ შეთანხმებას ტოვებს. ეს ინფორმაცია BBC-ის ცნობით, ამერიკის შეერთებული შტატების პრეზიდენტმა, დონალდ ტრამპმა Fox News-თან ინტერვიუში დაადასტურა.

Fox News-თან ინტერვიუში ტრამპმა თქვა, რომ რუსეთი ბირთვული რაკეტების ლიკვიდაციის შესახებ შეთანხმებას ჯერ კიდევ ობამას პრეზიდენტობის პერიოდიდან არღვევდა. ტრამპის თქმით, მან არ იცის, რატომ არ აწარმოებდა ბარაკ ობამა ამ საკითხზე მოლაპარაკებებს.

" რუსეთ წლების განმავლობაში არღვევს ამ შეთანხმებას. ჩვენ არ მივცემთ რუსეთს უფლებას, შეთანხმება დაარღვიოს", — განაცხადა ტრამპმა.

ოფიციალური ვაშინგტონის დადასტურებამდე, საერთაშორისო მედია იუწყებოდა, რომ ტრამპის ადმინისტრაცია ბირთვული რაკეტების ლიკვიდაციის შესახებ შეთანხმების დატოვებას გეგმავს.

1987 წელს აშშ-სა და საბჭოთა კავშირს შორის დაიდო შეთანხმება. მხარეები შეთანხმდნენ, რომ 500-5500 კილომეტრამდე დისტანციაზე მოქმედი ბირთვული რაკეტების ლიკვიდაციას მოახდენდნენ. ხელშეკრულებას რონალდ რეიგანმა და მიხეილ გორბაჩოვმა მოაწერეს ხელი. ამ შეთანხმების საფუძველზე 2700-ზე მეტი რაკეტა განადგურდა.