ნინო ბურჯანაძე 18 აგვისტოს, გამთენიისას მოსკოვიდან თბილისში დაბრუნდა. იგი რუსეთის დედაქალაქში სახელმწიფო დუმის თავმჯდომარეს სერგეი ნარიჟკინს შეხვდა. როგორც ბურჯანაძემ ჟურნალისტებთან საუბრისას აღნიშნა, რუსეთის მაღალჩინოსანთან ერთ-ერთი განსახილველი საკითხი უბლოკო სტატუსს ეხებოდა.

ნინო ბურჯანაძის ინიციატივით, საქართველოს კონსტიტუციაში უბლოკო სტატუსის ჩანაწერი უნდა შევიდეს, რომლის მიხედვით, კონსტიტუციურად უნდა აუკრძალონ საქართველოს ევროპული და ევროატლანტიკური ინტეგრაცია:

"ამ შეხვედრით კიდევ ერთხელ დავრწმუნდი რაოდენ მნიშვნელოვანია რუსეთის უმაღლეს პირებთან პირდაპირი უშუალო დიალოგის წარმოება. მე გარწმუნებთ, რომ არჩევნების შემდეგ ყველაფერს გავაკეთებ იმისათვის რომ უმაღლეს დონეზე გაიმართოს დიალოგი, უმაღლეს დონეზე შევხვდე რუსეთის ხელისუფლების მმართველ პირებს და ეს ჩვენ დაგვეხმარება რუსულ- ქართული ურთიერთობები გადავიყვანოთ ახალ ჭრილში. თუ აუცილებელი იქნება, არჩევნებამდე კიდევ ერთი შეხვედრის ჩატარება, მე არ გამოვრიხცავ რომ ასეთი ვიზიტი შედგეს".

12 აგვისტოს, ამის საპასუხოდ რესპუბლიკური პარტიის ლიდერმა დავით უსუფაშვილმა განცხადება გააკეთა და პარლამენტში საკონსტიტუციო ცვლილების შეტანის ინიციატივა გააჟღერა, რომელიც ქვეყნის სწრაფვას განსაზღვრავს ევროატლანტიკური სტრუქტურებისკენ. უსუფაშვილი მოუწოდებს სხვა პარტიებსაც, დააფიქსირონ საკუთარი პოზიცია, აღნიშნულ საკითხთან დაკავშირებით.