შინაგან საქმეთა სამინისტროს ინფორმაციით, დააკავეს ათკაციანი ჯგუფი, რომელმაც ფულის გამოძალვისთვის ადამიანი გაიტაცა. უწყების თქმით, გამტაცებლები გამოსასყიდის სახით სამ მილიონ ლარს ითხოვდნენ. ტელეკომპანია რუსთავი 2-ის ინფორმაციით, გამტაცებლებმა ბიზნესმენის შვილი გაიტაცეს.

გამოძიების ინფორმაციით, დაკავებულებმა 1995 წელს დაბადებულ ახალგაზრდას თბილისის ერთ-ერთ ქუჩაზე უკანონოდ აღუკვეთეს თავისუფლება და გაურკვეველი მიმართულებით გაიტაცეს.

როგორც სამინისტრო აცხადებს, ახალგაზრდას მამამ მიმართა პოლიციას და აცნობა, რომ გამტაცებლები მას მობილურ ტელეფონზე დაუკავშირდნენ, შვილის გამოსასყიდად დიდი ოდენობით თანხა მოსთხოვეს, წინააღმდეგ შემთხვევაში კი შვილის მკვლელობით დაემუქრნენ.

გამოძიების ინფორმაციით, გატაცებული შეიარაღებულ გამტაცებლებს იმერეთის ერთ-ერთ სოფელში ჰყავდათ გადამალული. პოლიციამ გატაცებული ახალგაზრდა სპეცოპერაციის შედეგად გაათავისუფლა. სამართალდამცველებმა სახლიდან, სადაც გამტაცებლებს მძევალი ჰყავდათ გადამალული, ნივთმტკიცებად ამოიღეს ცეცხლსასროლი იარაღი.

გამოძიება საქართველოს სისხლის სამართლის კოდექსის 144-ე მუხლით მიმდინარეობს. ჩადენილი დანაშაული 9-დან 14 წლამდე ვადით თავისუფლების აღკვეთას ითვალისწინებს.