პრემიერ-მინისტრი მამუკა ბახტაძე უახლოეს დღეებში საგანგებო სხდომის მოწვევის შესახებ პრეზიდენტის ინიციატივას პასუხობს და ამბობს, რომ საქართველოში მთავრობის სხდომები ჩვეულებრივი განრიგითა და რეჟიმით ტარდება.

"ბუნებრივია, ჩვენ მზად ვართ ნებისმიერ საკითხზე სასაუბროდ. რაც შეეხება მთავრობაზე განსახილველ საკითხებს, ამას არეგულირებს შესაბამისი საკანონმდებლო ჩარჩო და ამის შესახებ მთავრობის ადმინისტრაცია განცხადებას აუცილებლად გააკეთებს", — განაცხადა პრემიერმა.

როგორც პრეზიდენტმა, გიორგი მარგველაშვილმა განაცხადა, მთავრობის სხდომაზე მას სურს სახელმწიფო ინსტიტუტების ეფექტიანი ფუნქციონირების, მოქალაქეთა უფლებებისა და თავისუფლებების დაცვის საკითხები განიხილოს.