რამდენიმე თვის წინ ცნობილი მეცნიერი სტივენ ჰოკინგი 76 წლის ასაკში გარდაიცვალა, თუმცა მისი ნაწერებიდან კაცობრიობას კიდევ ბევრი რამის სწავლა შეუძლია.

უკანასკნელ წიგნში, რომელიც 16 ოქტომბერს გამოქვეყნდება, ჰოკინგი კაცობრიობას აფრთხილებს, რომ გენურმა ინჟინერიამ, შესაძლოა, ადამიანის ევოლუციას სახიფათო ტრაექტორია მისცეს.

გენური ინჟინერიის ისეთი მეთოდები, როგორიც, მაგალითად, Crispr-ია, საშუალებას მოგვცემს, რომ ადამიანებში გენეტიკური დეფექტები აღმოვფხვრათ და სუპერადამიანების რასა მივიღოთ.

"ჩვენ შევდივართ ახალ ფაზაში, რომელშიც ევოლუციას ადამიანი საკუთარი სურვილისამებრ წარმართავს. ჩვენ ადამიანის დნმ უკვე გაშიფრული გვაქვს, რაც ნიშნავს, რომ ჩვენ "სიცოცხლის ხეზე" ხელი უკვე მიგვიწვდება და ახლა შეგვიძლია მისი მოდიფიცირება დავიწყოთ. მე დარწმუნებული ვარ, რომ ამ საუკუნეში გაჩნდებიან ადამიანები, რომლებსაც ხელოვნურად გაუმჯობესებული თვისებები ექნებათ, მაგალითად, დაავადებებისადმი რეზისტენტულობა, გაუმჯობესებული მეხსიერება, სიცოცხლის გაზრდილი ხანგრძლივობა და ა.შ.", - წერს ჰოკინგი.

მეცნიერი ვარაუდობს, რომ მდიდრები საკუთარი დნმ-ის მოდიფიცირებას ადვილად შეძლებენ, რითაც საბოლოოდ სუპერადამიანების რასას მივიღებთ, რომელთაც კონკურენციას ჩვეულებრივი ადამიანები ვერ გაუწევენ.

"საბოლოოდ ჩვეულებრივი ადამიანები უმნიშვნელონი გახდებიან და დაიღუპებიან, სუპერადამიანები კი საკუთარ რასას უფრო და უფრო გააუმჯობესებენ", - წერდა მეცნიერი.

Crispr-Cas9 დნმ-ის მოდიფიცირების ერთ-ერთი მეთოდია, რომელიც ექვსი წლის წინ შეიქმნა. ის საშუალებას გვაძლევს, რომ დნმ-ს გენები სურვილისამებრ ვცვალოთ. მეცნიერებმა აღნიშნული მეთოდის გამოყენება უკვე დაიწყეს, ლონდონის ერთ-ერთ საავადმყოფოში მეცნიერებმა გენური ინჟინერიით ლეიკემიის ერთ-ერთი ფორმაც დაამარცხეს, რომელიც აქამდე უკურნებელი იყო.

მიუხედავად ამ საკითხის სიმძაფრისა, ჰოკინგისთვის კაცობრიობის ყველაზე დიდი საფრთხე "სუპერადამიანები" სულაც არ არის. ამ ტიტულს ზეგანვითარებული ხელოვნური ინტელექტი და პლანეტარული მასშტაბის კატასტროფა, მაგალითად, ჩვენკენ მომავალი ასტეროიდი იკავებს.