ტელეკომპანია რუსთავი 2-მა ახალი აუდიოჩანაწერი გაასაჯაროვა, რომელშიც, სავარაუდოდ, ომეგა ჯგუფის დამფუძნებელი, ზაზა ოქუაშვილი და სპორტის ყოფილი მინისტრი, ლევან ყიფიანი მონაწილეობენ.

ჩანაწერის მიხედვით, სავარაუდოდ ლევან ყიფიანი ამბობს, რომ ყოფილ მთავარ პროკურორთან, ოთარ ფარცხალაძესთან "უსიამოვნება" მოუვიდა. იგი ჰყვება, რომ სარდაფში თავისი ფეხით მივიდა, ფარცხალაძეს შეაგინა, ისიც აგინებდა, გააკავა და რამდენჯერმე დაარტყა.

სპორტის ყოფილი მინისტრი ლევან ყიფიანი ყოფილ პროკურორთან, ოთარ ფარცხალაძესთან კონფლიქტს უარყოფს. ამის შესახებ პროკურატურის მიერ გავრცელებულ ოქმშია ნათქვამი, რომელიც ლევან ყიფიანის მიერ 9 სექტემბერს სამართალდამცველებისთვის მიცემულ ჩვენებას ასახავს.

ოქმში წერია, რომ ყიფიანს ფარცხალაძესთან მეგობრული ურთიერთობა ჰქონდა.

"რაც შეეხება ჩემი და ფარცხალაძის კონფლიქტს, მერე ამაზე მიბმულ თრილერს სარდაფთან დაკავშირებით, ეს სრული სისულელეა. ჩანაწერი, სადაც მე ვსაუბრობ ავარიაზე, ხოლო ზაზა ოქუაშვილი აკონკრეტებს და საუბრობს ფიზიკურ შეურაცხყოფაზე, როგორც აღვნიშნეთ არის ინსცენირება და დადგმულია ზაზა ოქუაშვილის ინიციატივით", - ნათქვამია ჩვენების ოქმში.

ამავე დოკუმენტის მიხედვით, ლევან ყიფიანი უარყოფს ინფორმაციას მისი სარდაფში ჩაყვანისა და გაუპატიურების მუქარის შესახებ.

"არც მისი ოფისის სარდაფში ვარ ნამყოფი და ისიც არ ვიცი აქვს თუ არა საერთოდ სარდაფი. შესაბამისად, არანაირი სამედიცინო დაწესებულებისთვის მე არ მიმიმართავს", — ვკითხულობთ პროკურატურის მიერ გავრცელებულ დოკუმენტში.

ომეგა ჯგუფის საქმე

10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფისდამფუძნებელ, ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს, ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა.

მოგვიანებით, რუსთავი 2-მა კიდევ ერთი ჩანაწერი გაავრცელა, სადაც სავარაუდოდ, ლევან ყიფიანი და ზაზა ოქუაშვილი ხელისუფლებასთან გარიგებაზე საუბრობენ. სავარაუდოდ, ლევან ყიფიანი ამბობს, რომ ის შეხვდა ბიძინა ივანიშვილს, რომელმაც ბიზნესის სანაცვლოდ 4 მილიონი მოსთხოვა. რუსთავი 2-ის ინფორმაციით, ყოფილი პროკურორი ოთარ ფარცხალაძე სპორტის ყოფილ მინისტრს ლევან ყიფიანს ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა.

საქართველოს მთავარი პროკურატურის განცხადებით, ომეგა ჯგუფის საქმეზე მედიაში გავრცელებული აუდიოჩანაწერები ავთენტური არაა და დამონტაჟებულია. სამხარაულის სახელობის ექსპერტიზის ეროვნულმა ბიურომ დასკვნა 4 ოქტომბერს გასცა.

ომეგა ჯგუფის საქმის ჩანაწერებზე ლევან ყიფიანი სასამართლოში 3 ოქტომბერს გამოიკითხა. სასამართლოში გამოკითხვის შემდეგ ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელმა, ზაზა ოქუაშვილმა მასთან შეთანხმებით ჩაწერა.

მისი თქმით, ამ ჩანაწერებზე დათანხმების მიზანი იყო, რომ ოქუაშვილს საქართველოში და საზღვარგარეთ ფინანსური პრობლემები მოეგვარებინა. მისი განმარტებით, ჩანაწერებით უცხოელი პარტნიორები სახელმწიფოს მიერ ომეგა ჯგუფზე ზეწოლის შესახებ შეიტყობდნენ, ოქუაშვილი კი ამ დროს საქართველოში ბიუჯეტის მიმართ არსებულ დავალიანების საკითხსაც გადაჭრიდა. თუმცა როგორც ყიფიანი განმარტავს, ის აუდიოჩანაწერები, რომელიც მედიით გავრცელდა დამონტაჟებულია.

ლევან ყიფიანის ადვოკატის განცხადებით, ისინი გეგმავენ, რომ ოქუაშვილს სასამართლოში უჩივლონ.

აუდიოჩანაწერებთან დაკავშირებით პროკურატურამ 12 სექტემბერს დაიწყო გამოძიება 180-ე მუხლის მესამე ნაწილის "ბ" ქვეპუნქტით, რაც სხვისი კუთვნილი დიდი ოდენობით ფულადი თანხის მოტყუებით დაუფლებას გულისხმობს.