სპორტის ყოფილი მინისტრი, ლევან ყიფიანი გეგმავს, რომ ზაზა ოქუაშვილს წინააღმდეგ სამოქალაქო სარჩელი შეიტანოს. ამის შესახებ ჟურნალისტებს ლევან ყიფიანის ადვოკატმა შალვა ხაჭაპურიძემ განუცხადა.

ადვოკატის ინფორმაციით, ისინი გეგმავენ, რომ პროკურატურას ოქუაშვილის წინააღმდეგ სისხლის სამართლის საქმის აღძვრაც მოსთხოვონ.

"უახლოეს დღეებში ვაპირებთ, რომ ვუჩივლოთ ზაზა ოქუაშვილს. თავდაპირველად შევიტანთ სამოქალაქო სარჩელს პატივისა და საქმიანი რეპუტაციის შელახვაზე და შემდგომ უკვე მოვითხოვთ სისხლის სამართლის საქმის აღძვრას ოქუაშვილის წინააღმდეგ, კონკრეტულად რა მუხლებით უნდა აღიძრას საქმე, ამაზე პროკურატურაში განცხადების ჩაბარების შემდგომ ვისაუბრებთ".

დღეს, საქალაქო სასამართლოში გამოკითხვის დასრულების შემდეგ ლევან ყიფიანს ჟურნალისტებმა სარდაფში ყოფილი პროკურორის, ოთარ ფარცხალაძის მიერ შესაძლო გაუპატიურებასთან დაკავშირებითაც ჰკითხეს.

"ეს არის ფარსი, ეს არის შეურაცხმყოფელი, ასეთი რამ არ ყოფილა", — თქვა ყიფიანმა.

10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფის დამფუძნებელ ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.