აშშ-ში ბრეტ კავანას საწინააღმდეგო აქციაზე ვაშინგტონის პოლიციამ 300-ზე მეტი ადამიანი დააკავა, მათ შორის არიან, მსახიობი ემი შუმერი და მოდელი ემილი რატაკოვსკი, წერს CNN.

ასობით ადამიანი სენატის შენობის წინ აპროტესტებდა უზენაესი სასამართლოს მოსამართლეობის კანდიდატურაზე ბრეტ კავანას წარდგენას, რომელიც სამმა ქალმა სექსუალურ შევიწროებასა და ძალადობაში დაადანაშაულა. ქალების თქმით, კავანამ მათზე სტუდენტობისას იძალადა. ბრეტ კავანა მოსამართლეობის კანდიდატად პრეზიდენტმა, დონალდ ტრამპმა წარადგინა.

ფოტო: Anadolu Agency / Getty Images

პროტესტის მონაწილეებმა სენატის შენობისკენ მსვლელობა გამართეს და მოსამართლის წასვლას მოითხოვდნენ. პარალელურად აქცია ნიუ-იორკში, ტრამპ თაუერის წინ ჩატარდა.

საპროტესტო აქციებია კავანას საქმეზე გამოძიების ფედერალური ბიუროს დასკვნამ გამოიწვია, რომლის მიხედვითაც კავანა ძალადობაში გაამართლეს. რესპუბლიკური პარტიის რამდენიმე სენატორმა დასკვნას მხარი დაუჭირა, ხოლო დემოკრატები ამბობენ, რომ ის არასრულია.

როგორც რესპუბლიკელები ამბობენ, გამოძიების ფედერალური ბიურო ხუთ მოწმეს ესაუბრა, რომელიც კრისტინ ბლეიზი ფორდის საქმესთან არის დაკავშირებული. ფორდი კავანას 1982 წელს, სტუდენტობისას სექსუალურ შევიწროებაში ადანაშაულებს.

კრისტინ ბლეიზი ფორდი სენატში დაკითხვისას

ფოტო: Michael Reynolds

გარდა ამისა, გავრცელდა ინფორმაცია, რომ გამოძიება ესაუბრა ოთხ მოწმეს, რომელიც დებორა რამირეზის საქმესთან არის კავშირში. ის კავანას იელის უნივერსიტეტში სწავლისას ერთ-ერთ წვეულებაზე ძალადობაში ადანაშაულებს.

დემოკრატმა სენატორმა, დაიან ფაინშტაინმა განაცხადა, რომ გამოძიება არასრულია და რამდენიმე მნიშვნელოვანი მოწმე გამოტოვებულია.