ფინანსთა სამინისტროს საგამოძიებო სამსახურის განცხადებით, მიმდინარე წლის 3 ოქტომბერს, დეველოპერული კომპანია სვეტის ორი ხელმძღვანელი თაღლითობის, კერძოდ კი, მენაშენეთა თანხების მითვისების ბრალდებით დააკავეს. გამოძიება მიმდინარე წლის 29 მაისს მენაშენეთა ერთობლივი განცხადების საფუძველზე დაიწყო.

როგორც განცხადებაში ვკითხულობთ, ბრალდებულებმა სამსახურებრივი მდგომარეობის გამოყენებით, განიზრახეს მართლსაწინააღმდეგო მისაკუთრების მიზნით მოტყუებით დაუფლებოდნენ მოქალაქეთა კუთვნილ დიდი ოდენობით თანხებს. განცხადებაში აღნიშნულია, რომ სვეტის მიერ 2016 წლის დასაწყისში დაანონსდა მასშტაბური ბინათმშენებლობის პროექტების დაწყება ისე, რომ კომპანიას მშენებლობის შესაბამისი ნებართვები არ ჰქონდა მიღებული.

გამოძიების ინფორმაციით, მხოლოდ ერთ ობიექტზე, ბრალდებულები მოტყუებით მენაშენეთა კუთვნილ 3 356 385 ლარის ოდენობით თანხას დაეუფლნენ.

გამოძიება მიმდინარეობს სისხლის სამართლის კოდექსის 180-ე მუხლის მე-3 ნაწილით, რაც გულისხმობს თაღლითობას, სამსახურებრივი მდგომარეობის გამოყენებით დიდი ოდენობით მართლსაწინააღმდეგო მისაკუთრების მიზნით სხვისი ნივთის დაუფლებას მოტყუებით. აღნიშნულია დანაშაული ისჯება ჯარიმით ან თავისუფლების აღკვეთით ვადით ექვსიდან ცხრა წლამდე.

გამოძიების პროცესში გამოიკითხა ორი ათასზე მეტი მენაშენე და საქმესთან შემხებლობაში მყოფი პირი. ამოღებულია დეველოპერულ კომპანია სვეტთან კავშირში მყოფი ორგანიზაციების საბუღალტრო და იურიდიული დოკუმენტაცია, რომლებზეც დაინიშნა თემატური შემოწმება და რევიზია. პარალელურად, კომპანიების მიერ თბილისში (მირცხულავას ქუჩა #9/11, ჭყონდიდელის ქუჩა#22, ნუცუბიძის ქუჩა #125, წერეთლის გამზ. #27) და ქალაქ ბათუმში (თამარ მეფის ქუჩა #1) მშენებარე ობიექტებზე ფაქტობრივად შესრულებული სამუშაოების ღირებულების დადგენის მიზნით, დაინიშნა და ამჟამადაც მიმდინარეობს საინჟინრო-ტექნიკური ექსპერტიზები.

საგამოძიებო სამსახური განმარტავს, რომ სვეტის ყველა მენაშენე, რომელსაც ბრალდებულების ქმედების გამო მიადგათ მატერიალური ზიანი, დაზარალებულებად გამოცხადდებიან.