პრემიერ-მინისტრმა მამუკა ბახტაძემ დღეს, 3 ოქტომბრის მთავრობის სხდომაზე გაეროს გენერალური ასამბლეის 73-ე სესიაზე სიტყვით გამოსვლა შეაფასა და თქვა, რომ ეს იყო ძალიან კარგი შესაძლებლობა მთელი მსოფლიოს წინაშე კიდევ გამოეკვეთა ოკუპაციის გამოწვევები:

"კიდევ ერთხელ, მთელი მსოფლიოს გასაგონად აღვნიშნეთ ის ძალიან მძიმე მდგომარეობა, რომელიც გვაქვს ჩვენს ტერიტორიაზე, ის ჰუმანიტარული კატასტროფა, რასაც სამწუხაროდ ჩვენ ყველანი ვხედავთ. ვფიქრობ, რომ ამერიკულ შეერთებულ შტატებში ვიზიტი იყო ძალიან შედეგიანი. საქართველო-აშშ-ის ურთიერთობები კიდევ უფრო მტკიცეა და თვისობრივად სრულიად ახალ ეტაპზეა".

28 სექტემბერს გაეროს 73-ე სესიაზე სიტყვით გამოსვლის დროს, პრემიერმა ყურადღება გაამახვილა ოკუპირებულ ტერიტორიებზე, ქვეყნის სამშვიდობო პოლიტიკაზე, ახალ ინიციატივებზე, ქვეყნის საგარეო კურსსა და მოლოდინებზე. ბახტაძე, პირველი იყო, რომელმაც გაეროს ტრიბუნიდან ასამბლეის მონაწილეებს ქართულ ენაზე მიმართა.

მამუკა ბახტაძის გამოსვლა გაეროს გენერალურ ასამბლეაზე სრულად — მთავარი აქცენტები

პრემიერის გამოსვლა გაეროში სხვადასხვაგვარად შეაფასეს პოლიტიკურმა პარტიებმა. ქართულ ოცნებაში მიაჩნიათ, რომ პრემიერმა გამოსვლის დროს სწორი აქცენტები დასვა. თუმცა, მმართველი გუნდისგან განსხვავებულად ფიქრობენ საპარლამენტო ოპოზიციის დეპუტატები. ნაციონალურ მოძრაობის აზრით, მამუკა ბახტაძის გამოსვლა, უკრაინის პრეზიდენტის, პეტრო პოროშენკოს კრიტიკულმა სიტყვამ განაპირობა, ევროპული საქართველოს პოზიციით კი პრემიერი გამოსვლისთვის მოუმზადებელი იყო.

სწორი აქცენტები თუ მოუმზადებელი სიტყვა — დეპუტატები ბახტაძის გაეროში გამოსვლას აფასებენ