უკანონო სამეწარმეო საქმიანობის ბრალდებით, 47 მეწარმე პასუხისგებაში მიეცა. ამის შესახებ ინფორმაციას ფინანსთა სამინისტროს საგამოძიებო სამსახური ავრცელებს.

უწყების მიერ გავრცელებულ განცხადებაში წერია, რომ 47 მეწარმიდან 23 კომერციულ საქმიანობას სახელმწიფო რეგისტრაციის გარეშე ეწეოდა; 20 მეწარმე შესაბამისი ნებართვის გარეშე ორგანიზებას უწევდა აზარტულ თამაშებს; 2 მეწარმე ავტორიზაციის და ლიცენზიის დარღვევით ახდენდა მედიკამენტების რეალიზაციას, ხოლო 2 კი ლიცენზირების პირობების დარღვევით მოიპოვებდა ინერტულ მასალას.

უწყების განმარტებითვე, საქმეზე გრძელდება საგამოძიებო მოქმედებები, სხვა დანაშაულის ჩამდენი პირების გამოვლენის მიზნით. მათივე ცნობით, გამოძიება მიმდინარეობს საქართველოს სისხლის სამართლის კოდექსის 192-ე მუხლის პირველი და მეორე ნაწილებით, რაც სასჯელის სახით ითვალისწინებს თავისუფლების აღკვეთას 3-დან 5 წლამდე ვადით.