ხანდახან საოფისე აურზაურს მოშორება და სახლიდან მუშაობა ახდენილი ოცნებასავითაა: შეგიძლია შინ პიჟამათი იარო, მუშაობის პროცესში შინაურ ცხოველს მოეფერო, ჯანსაღი საჭმელი მოიმზადო და მუშაობის პროცესში მიირთვა. ამ შემთხვევაში კომფორტულ ზონაში ყოფნას ის პლიუსიც აქვს, რომ ადამიანებთან ურთიერთობაში ნაკლებ დროსა და ენერგიას ხარჯავ და საქმესაც მეტი ყურადღებით შეასრულებ, თუმცა, ამ მყუდრო სიტუაციამ შესაძლოა ბედნიერად არც ისე დიდხანს გასტანოს და ამაში შენივე ხასიათი იყოს დამნაშავე.

შრომისა და ორგანიზაციის ფსიქოლოგიის ევროპულ ჟურნალში გამოქვეყნებული ახალი კვლევის მიხედვით, კონკრეტული მახასიათებლების არქონის შემთხვევაში, სახლიდან მუშაობის პროცესმა დამატებითი სტრესი შეგიქმნას.

გამოკითხვაში 403-მა დასაქმებულმა მოზრდილმა მიიღო მონაწილეობა. მკვლევარებმა მათი დამოუკიდებლობის ხარისხი, დაძაბულობის (გადაღლა, უკმაყოფილება, დაუინტერესებლობა) მაჩვენებელი და ემოციური მდგრადობა შეამოწმეს.

როგორც მკვლევარებმა აღმოაჩინეს, სახლიდან წარმატებულად მუშაობა იმ ადამიანებს შეუძლიათ, რომელთაც მაღალი ემოციური მდგრადობა აქვთ და თვითმენეჯმენტსაც კარგად ახერხებენ.

ის, ვინც სამსახურს პასუხისგებლობის გრძნობით უდგება, თუმცა ემოციურ სტაბილურობას სტრესულ სიტუაციებში ვერ ინარჩუნებს, სახლიდან მუშაობის პირობებში მაღალი სტრესის ქვეშ ექცევა.

"თუ თანამშრომელი საოფისე სიტუაციაში სტრესს კარგად ვერ უმკლავდება, ის იგივეს სახლშიც ვერ შეძლებს", - ამბობს კვლევის ავტორი სარა პერი.

მკვლევარის სიტყვებით, ის ადამიანები, რომლებიც სტრესულ სიტუაციაში პოზიტიურობასა და ემოციურ მდგრადობას ინარჩუნებენ, პრობლემების გადაწყვეტასა და სამუშაოს შესრულებას უკეთ ახერხებენ.

"ის ადამიანები, რომლებიც იმედგაცრუებასა და უმოტივაციობას განიცდიან, დიდ ენერგიას ხარჯავენ საკუთარი ემოციური სტაბილურობისთვის, ამიტომ მათ დავალების შესასრულებლად საკმარისი ძალა აღარ რჩებათ", - დასძენს მეცნიერი.

ასე რომ, შეიძლება სახლიდან მუშაობა ბევრად უფრო მოქნილად გეჩვენებათ, მაგრამ ჯობს, დააკვირდეთ, როგორ მოქმედებს ის თქვენს ემოციურ ჯანმრთელობაზე. თუ სახლიდან მუშაობთ და პროფესიულ სტრესს განიცდით, კარგი იქნება, თუ მიზეზებს დააზუსტებთ და ამის შესახებ დამსაქმებელსაც აცნობებთ.