საქართველოს მაღალმთიან რეგიონებში ინტენსიური თოვისა და ლიპყინულის გამო ავტოტრანსპორტის გადაადგილებაზე გარკვეული შეზღუდვებია დაწესებული. ekhokavkaza-ს ინფორმაციით, საქართველოს სამხედრო გზისა და ტრანსკავკასიის ავტომაგისტრალის გახსნას 900-მდე ავტომობილი ელოდება.

საავტომობილო გზების დეპარტამენტის ინფორმაციით, შეზღუდვები როგორც აღმოსავლეთ, ისე დასავლეთ საქართველოს მაღალმთიან რეგიონებს ეხება. კერძოდ,

ყველა სახის ავტოტრანსპორტის გადაადგილებაა აკრძალული მცხეთა-სტეფანწმინდა-ლარსის საავტომობილო გზის გუდაური(ფოსტა)-კობისა და ზუგდიდი-ჯვარი-მესტია-ლასდილის საავტომობილო გზის კალა-უშგულის მონაკვეთზე.

არაგვისპირი-გუდაური-ლარსის მონაკვეთსა და ზუგდიდი-ჯვარი-მესტია-ლასდილის გზის ლახამურა-კალას მონაკვეთებზე მისაბმელიანი, ნახევრადმისაბმელიანი ავტოტრანსპორტისა და 30 ადგილზე მეტი ტევადობის ავტობუსების მოძრაობა იკრძალება.

დანარჩენი სახის ავტოტრანსპორტის მოძრაობა თავისუფალია არაგვისპირი-გუდაურის, კობი-ლარსისა და ზუგდიდი-მესტიის მონაკვეთებზე. რაც შეეხება მესტია-კალას მონაკვეთს, აქ გადაადგილება მხოლოდ მოცურების საწინააღმდეგო ჯაჭვების გამოყენებითაა დაშვებული. ორი და მეტი წამყვანი ხიდის მქონე ტრანსპორტის გადაადგილება თავისუფალია.

სტეფანწმინდა-ლარსის მონაკვეთზე ავტოტრასნპორტის მიმოსვლისას მათი გაჩერება იკრძალება.

ზუგდიდი-ლახამურას მონაკვეთზე კი ყველა სახის ტრანსპორტის მოძრაობაა დაშვებული.