აშშ-ის პრეზიდენტმა ესპანეთის ხელისუფლებას შესთავაზა, რომ ხმელთაშუა ზღვიდან მიგრანტების ნაკადის შესაჩერებლად საჰარას უდაბნოში კედელი ააშენონ.

როგორც ესპანეთის საგარეო საქმეთა მინისტრი ამბობს, ხელისუფლება კედლის მიმართ სკეპტიკურად განეწყო, რადგან საჰარას უდაბნო დაახლოებით 4 828 კილომეტრია. დონალდ ტრამპმა კი აღნიშნა, რომ საჰარას საზღვარი "ვერ იქნება აშშ-მექსიკის საზღვარზე უფრო დიდი".

2016 წლის საპრეზიდენტო არჩევნებისას დონალდ ტრამპის ერთ-ერთი მთავარი დაპირება მექსიკის საზღვარზე კედლის აშენება იყო. როგორც The Guardian წერს, ესპანეთის მდგომარეობას ართულებს ის, რომ ჩრდილოეთ აფრიკაში მას მხოლოდ ორი ანკლავი აქვს და მსგავსი კედელი სხვა ქვეყნის ტერიტორიაზე უნდა აშენდეს.

ესპანეთი აფრიკიდან გამოქცეული მიგრანტებისათვის ერთ-ერთ მთავარ პუნქტს წარმოადგენს. ბოლო ერთ წელში ხმელთაშუა ზღვიდან ესპანეთმა იმაზე მეტი მიგრანტი მიიღო, ვიდრე საბერძნეთმა ან იტალიამ.