საქართველოს პარლამენტის ადამიანის უფლებათა კომიტეტის თავმჯდომარის, სოფო კილაძის განცხადებით, მმართველი გუნდის მიერ მხარდაჭერილი პრეზიდენტობის კანდიდატის, სალომე ზურაბიშვილის წინააღმდეგ უღირსი კამპანია მიმდინარეობს, რადგან ქალია. ამის შესახებ სოფო კილაძემ პარლამენტის პლენარულ სხდომაზე სიტყვით გამოსვლისას განაცხადა.

"ჩვენი ქვეყნის ტრადიცია არის ქალის პატივისცემა. მსოფლიოში ერთ-ერთი მიმართულება არის ქალთა უფლებებისთვის ბრძოლა და ქალთა პოლიტიკაში ჩართულობის გაუმჯობესება. მიუხედავად ამისა, ჩვენ ვხედავთ, რომ ქალ პოლიტიკოსზე მიმდინარეობს თავდასხმა ყველაზე უღირსი ფორმებით იმიტომ, რომ ის არის ქალი", - განაცხადა სოფიო კილაძემ.

ის ფიქრობს, რომ სალომე ზურაბიშვილის პრეზიდენტობის კანდიდატობას უნდა მიესალმოს ყველა, ვისაც თავი პროდასავლელ პოლიტიკოსად მიაჩნია.

"სალომე ზურაბიშვილს თავს ესხმიან უღირსი ფორმებით, რაც რბილად რომ ვთქვათ არის ძალიან ამორალური. ქალთა პოლიტიკაში ჩართულობას უნდა მიესალმებოდნენ ისინი, რომლებსაც აქვთ პრეტენზია, რომ არიან პროევროპული და პროდასავლური ლიდერები. ქალთა პოლიტიკური ჩართულობა ხარისხობრივად აუმჯობესებს გადაწყვეტილების მიღებას პოლიტიკაში, არის უფრო ჰუმანური, სოციალურად ორიენტირებული და კარგად აისახება მოსახლეობის ცხოვრების დონის გაზრდაზე", - განაცხადა დეპუტატმა.

მისი თქმით, საქართველოს ეყოლება პირველად ისტორიაში ქალი პრეზიდენტი.

ოპონენტები სალომე ზურაბიშვილს აგვისტოს ომთან დაკავშირებით გაკეთებული განცხადებების გამო აკრიტიკებენ. ზურაბიშვილმა თქვა, რომ 2008 წლის აგვისტოში საომარი მოქმედებები საქართველომ დაიწყო და საკუთარი მოსახლეობა დაბომბა. ოპონენტებმა ზურაბიშვილის განცხადებებს უპასუხისმგებლო და მოღალატეობრივი უწოდეს.