როგორც უკვე იცით, რეჟისორი და მსახიობი ელიზაბეტ ბენკსი Sony Pictures-თან ერთად პოპულარული ამერიკული ტელესერიალისა და ფილმის, ჩარლის ანგელოზების ახალ ვერსიას იღებს.

ბენკსის მხატვრული ფილმი ეკრანზე 2019 წლის 27 სექტემბერს გამოვა, ახალი აგენტების როლზე კი უკვე დამტკიცებულია სამივე მსახიობი.

ჩარლის ახალი ანგელოზების როლზე კრისტენ სტიუარტი, ნაომი სკოტი და ელა ბალინსკა იქნებიან.

გარდა ამისა, ცნობილი გახდა, რომ აგენტების დამხმარის, ბოსლის როლს Star Trek-ისა და X-Men-ის ვარსკვლავი, პატრიკ სტიუარტი მოირგებს.

ანგელოზების პირველი ვერსია (სერიალი) ABC-ის ეთერში 1976-1981 წლებში გადიოდა და 110 ეპიზოდის განმავლობაში ამერიკული პოპ კულტურის ერთ-ერთ თვალსაჩინო ნიმუშად იქცა. მოგვიანებით, 2000 წელს სწორედ ამ შოუს მიხედვით გადაიღეს შემოსავლების ერთ-ერთი ლიდერი ფილმი, სადაც ანგელოზების როლს კამერონ დიაზი, ლუსი ლუ და დრიუ ბერიმორი ასრულებდნენ.