საქართველოს პრემიერ მინისტრის, მამუკა ბახტაძის განცხადებით, კანაფის კულტივაციის ადმინისტრაციული წესით მიღება, ქართული ოცნების ხელწერა არ არის და ეს საკითხი ფართო საზოგადოებრივი კონსენსუსის შედეგად უნდა გადაწყდეს. ამის შესახებ ბახტაძემ ვაშინგტონში, ჟურნალისტების მიერ ამ თემაზე დასმული კითხვის საპასუხოდ განაცხადა.

მთავრობის მეთაური მიიჩნევს, რომ კულტივაციის ნაწილში საჭიროა მეტი კომუნიკაცია მოქალაქეებსა და საზოგადოებასთან, რათა კიდევ ერთხელ კარგად განიმარტოს და მოსმენილი იყოს ამ კანონპროექტის როგორც მხარდამჭერი, ისე სასინააღმდეგო არგუმენტები და პოზიციები შეჯერდეს.

საქართველოს პარლამენტმა კანაფის კონტროლის შესახებ კანონის პროექტის განხილვა გადაავადა. გადაწყვეტილება დეპუტატებმა 17 სექტემბრის ბიუროს სხდომაზე მიიღეს. გადავადება ნიშნავს, რომ კანონპროექტის საკომიტეტოს განხილვა პარლამენტში ჯერ არ დაიწყება. უცნობია გადავადების ზუსტი დროც.

კანონპროექტის გადავადების გადაწყვეტილება უმრავლესობამ მას შემდეგ მიიღო, რაც აღნიშნულ ინიციატივას საქართველოს მართლმადიდებელი ეკლესია დაუპირისპირდა.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტის კანონპროექტზე მუშაობდა სასულიერო პირებმა რადიკალური განცხადებები გააკეთეს. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.