საქართველოს სახალხო დამცველი, ნინო ლომჯარია აცხადებს, რომ ბოლო პერიოდში მის მიმართ დეზინფორმაციული კამპანია დაიწყო. საპატრიარქო ლომჯარიას ბავშვებთან ჰომოსექსუალობის პროპაგანდაში ადანაშაულებს და ამბობს, რომ ამ მიზეზით ომბუდსმენის წარმომადგენლებს ბავშვთა პანსიონში უფროსის გარეშე გასაუბრების უფლება არ მისცეს.

ლომჯარიას თქმით, საპატრიარქოს წარმომადგენლებს და სასულიერო პირებს სხვებზე მეტად მოეთხოვებათ არ გაავრცელონ პირის მიმართ ცილისმწამებლური ინფორმაცია და ხელი არ შეუწყონ სიძლვილისა და აგრესიის გაღვივებას, თუმცა პირიქით იქცევიან.

"მსგავსი ინფორმაციის გავრცელებას და საზოგადოების შეცდომაში შეყვანას ისეთი მუქარებიც მოსდევს, როგორიცაა - ტყვიის შუბლში დახლა, გინება, ფიზიკური ანგარიშსწორება და ა.შ. რაც წესით, რელიგიური და მორწმუნე ადამიანისთვის და მითუმეტეს საპატრიარქოს წარმომადგენლებისთვის მიუღებელი უნდა იყოს, თუმცა, სამწუხაროა, რომ თუნდაც ამ პოსტის ქვეშ არსებულ მსგავსი მუქარების მიმართ, როგორც ჩანს, პოსტის ავტორები შემწყნარებლები რჩებიან", - განაცხადა ლომჯარიამ.

ლომჯარიას განცხადებით, ადამიანის უფლებების დაცვის თვალსაზრისით სახალხო დამცველის და საპატრიარქოს თანამშრომლობა ძალიან მნიშვნელოვანია და იმედი აქვს, რომ საპატრიარქო მომხდართან დაკავშირებით რეაგირებას მოახდენს.

12 სექტემბერს, საქართველოს საპატრიარქოს ქ. ნინოწწმიდის ბავშვთა პანსიონში სახალხო დამცევლის აპარატის წარმომადგენლები იმყოფებოდნენ. მონიტორინგის მეთოდოლოგიიდან გამომდინარე მათ ბავშვებთან უშუალო, უფროსი პირების გარეშე გასაუბრება მოითხოვეს, რაზეც უარი მიიღეს.

საპატრიარქოში განაცხადეს, რომ ბავშვთა სახლის ხელმძღვანელობამ ომბუდსმენის თანამშრომლებს უნდობლობა გამოუცხადა და არ მისცეს ბავშვებთან გასაუბრების უფლება, რადგანაც ისინი ერთნაირსქესიანთა ქორწინების დაკანონებას და სხვა "მომაკვდინებელ ცოდვებს" უწევენ პროპაგანდას.