ყველაზე პოპულარული ჩინელი მსახიობი ფან ბინბინი უკვე 3 თვეა არავის უნახავს. ბოლოს საჯაროდ ის პირველ ივლისს გამოჩნდა, ამის შემდეგ კი უკვალოდ გაქრა.

მსახიობს ჟურნალისტები და ფანები მთელი მსოფლიოს მასშტაბით ეძებენ, ითხოვენ ინფორმაციას პოლიციისგანაც, თუმცა ამ ეტაპზე მისი ადგილსამყოფელის შესახებ ინფორმაცია არავის აქვს.

ერთ-ერთი გამოცემის ცნობით, მსახიობი ჩინეთში დიქტატორულ რეჟიმს გაექცა, ახლა ლოს-ანჯელესშია და აშშ-ს თავშესაფარს სთხოვს.

ჩინეთის მთავრობა, ბინბინს გადასახადების დამალვაში ადანაშაულებდა, მსახიობის გაუჩინარებამ და ამ ბრალდებამ კი გააჩინა ჭორები, რომ შესაძლოა ჩინეთის ვარსკვლავი, გადასახადების გადაუხდელობისთვის დააკავეს.

ხელისუფლებასთან ერთად მსახიობს აკრიტიკებდა ჩინური მედიის ნაწილიც და ხშირად საუბრობენ მასზე, როგორც ახალგაზრდებისთვის არამისაბაძ მაგალითზე.

ამის მაგალითია მთავრობის მიერ დაფინანსებული ბოლო გამოკითხვაც, რომელშიც ფანმა 0 პროცენტი მიიღო და სოციალური ყველაზე უპასუხისმგებლოს სტატუსი მიანიჭეს.

ფანის მიმართ კრიტიკა ჯერ კიდევ მაშინ გაისმა, როდესაც ის ფორბსმა ერთ-ერთ ყველაზე მაღალანაზღაურებად მსახიობად დაასახელა, მაშინ ხელისუფლება და მედია აქტიურად მოუწოდებდა მსახიობს, რომ ხელი არ შეეწყო ფულის გაღმერთებისთვის და არ მოეხდინა "დამახინჯებულ სოციალურ ღირებულებების" პოპულარუზაცია.

ამის შემდეგ, ბინბინსა და სხვა მსახიობებს, ხელისუფლებამ ჰონორარის მისაღებად გარკვეული ზღვარი დაუწესა.

ჩინეთის გარდა, ბინბინი დიდი პოპულარობით სარგებლობს ჰოლივუდშიც. მას მონაწილეობა უნდა მიეღო ახალ ჯაშუშურ ტრილერში 355, სადაც პარტნიორობას ჯესიკა ჩესტეინს, პენელოპე კრუზს, ლუპიტა ნიონგოს და მარიონ კოტიარს გაუწევდა, თუმცა ამ ეტაპზე უცნობია ითამაშებს თუ არა ისევ ჩინელი მსახიობი ფილმში.