მამა, რომელსაც სვანეთში 8 შვილი სახლში ჰყავდა გამოკეტილი, დაკავებულია. შინაგან საქმეთა სამინისტროში On.ge-ს განუცხადეს, ამირან დევნოზაშვილი დაახლოებით ერთი კვირის წინ, სისხლის სამართლის კოდექსის 150-ე, იძულების მუხლით დააკავეს. შსს-ში სხვა დეტალებზე ამ ეტაპზე არ საუბრობენ.

უწყებაში ამბობენ, რომ ამჟამად ბავშვებთან ფსიქოლოგები მუშაობენ.

ამირან დევნოზაშვილისა და მისი ოჯახის ისტორია 2018 წლის 27 იანვარს, რუსთავი 2-ზე გასული სიუჟეტით გახდა ცნობილი. დევნოზაშვილის უმცროსი შვილი 10 წლამდე ასაკისაა. მათგან ყველაზე უფროსი გოგო კი 21 წლის. მათ არც სკოლაში და არც საბავშვო ბაღში არასდროს უვლიათ. მამას მიაჩნია, რომ საზოგადოებისგან მხოლოდ ცუდს ისწავლიან.

სისხლის სამართლის კოდექსის 150-ე მუხლის მეორე ნაწილით, იძულება დამნაშავისათვის წინასწარი შეცნობით არასრულწლოვნის, უმწეო მდგომარეობაში მყოფის მიმართ, ისჯება გამასწორებელი სამუშაოთი ვადით ორ წლამდე ან თავისუფლების აღკვეთით ვადით თვრამეტ თვემდე.

On.ge სოციალური მომსახურების სააგენტოდან პასუხს ელოდება.