აშშ-ის ვიცე-პრეზიდენტმა, მაიკ პენსმა განაცხადა, რომ კოსმოსური ძალები, როგორც მეექვსე სამხედრო სამსახური, 2020 წლისთვის შეიქმნება. მისი თქმით, მსგავსი ქმედებები საჭიროა, რათა, ჩინეთიდან და რუსეთიდან მომდინარე მზარდი კონკურენციისა და საფრთხის პირობებში, ამერიკამ კოსმოსში დომინანტობა შეინარჩუნოს.

"ჩვენმა მოწინააღმდეგეებმა უკვე გადააქციეს კოსმოსი საბრძოლო ველად და ამ პრობლემაზე ჩვენ თვალს არ დავხუჭავთ", - განაცხადა პენსმა პენტაგონში გამოსვლისას.

ინიციატივას აშშ-ის პრეზიდენტი, დონალდ ტრამპი ტვიტერზეც გამოეხმაურა.

კოსმოსური ძალების შექმნის შემთხვევაში ეს პირველი სამხედრო დანაყოფი გახდება, რომელიც აშშ-ში 1947 წლის შემდეგ შექმნილა. ის გაუთანაბრდება არმიას, ფლოტს, სამხედრო-საჰაერო ძალებს, საზღვაო ქვეითსა და სანაპირო დაცვას.

მიუხედავად იმისა, რომ პრეზიდენტი ახალი ძალების შექმნის მხარდამჭერია საბოლოოდ გადაწყვეტილება კონგრესმა უნდა მიიღოს.

პენსის განმარტებით, შეიქმნება აშშ-ის კოსმოსური სარდლობა, რომელიც ჩამოაყალიბებს დოქტრინასა და კოსმოსში ომის წარმართვის ტაქტიკას. გარდა ამისა, თავდაცვის მდივანს კოსმოსის საკითხებისთვის თანაშემწე ეყოლება, რომელიც, ამავე დროს, კოსმოსურ ძალებს ჩაუდგება სათავეში.