ყოფილმა მთავარმა პროკურორმა, ირაკლი შოთაძემ ხორავას ქუჩის საქმის კომისიის სხდომაზე განაცხადა, რომ მირზა სუბელიანის გადადგომის სამართლებრივი საფუძველი არ არსებობდა. სუბელიანმა თანამდებობა მას შემდეგ დატოვა, რაც საქმესთან მისი შვილის კავშირიც იკვეთებოდა.

კომისიის წევრი გიგა ბოკერია ირაკლი შოთაძეს რამდენჯერმე ჩაეკითხა დადებითად აფასებდა თუ არა ის სუბელიანის გადაწყვეტილებას.

"მე რომ ვყოფილიყავი მირზა სუბელიანის ადგილზე, მეც მივიღებდი ანალოგიურ გადაწყვეტილებას, რათა პროკურატურა ამერიდებინა შესაბამისი ზიანისგან", - განაცხადა შოთაძემ.

მისივე თქმით, მას, როგორც მთავარ პროკურორს, თავისი თანამშრომლის დაცვა სურდა და ამიტომაც შესთავაზა სუბელიანს თანამდებობა არ დაეტოვებინა.

მირზა სუბელიანი 9 ივნისს დანაშაულის შეუტყობინებლობის ბრალდებით დააკავეს. წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს.

ადვოკატის თქმით, სუბელიანი ბრალს აღიარებს. სასამართლომ აღკვეთის ღონისძიებად მას პატიმრობა შეუფარდა.