საბერძნეთში, ხანძრიდან ექვსი დღის შემდეგ გამოცხადებული ოფიციალური ინფორმაციით, სტიქიის შედეგად 91 ადამიანია დაღუპული. ამასთან, CBSNEWS-ის ცნობით, დაკარგულია 25 ადამიანი.

მსხვერპლთა უმრავლესობა უშუალოდ ხანძრის შედეგად გარდაიცვალა, ნაწილი კი ზღვაში მაშინ დაიხრჩო, როცა ცეცხლს გაურბოდა.

სანამ სახელმწიფო სახანძრო სამსახური ინფორმაციას განაახლებდა, ოფიციალური პირები აცხადებდნენ, რომ გარდაცვლილთა რიცხვი 86 იყო. კვირას, დილით მგლოვიარეები ხსოვნის საღამოს დაესწრნენ. სამგლოვიარო საღამო იმ ზღვისპირა სოფელში გაიმართა, რომელიც სტიქიამ ყველაზე მეტად დააზარალა.

გერიის მთის ფერდობზე დაწყებული ხანძარი სოფელ მატიში 23 ივლისს გავრცელდა. ბრიუსელის კატასტროფების კვლევის ცენტრის მონაცემებით, ეს ყველაზე მომაკვდინებელი ხანძარი იყო ევროპაში 1900 წლის შემდეგ. საბერძნეთის ხელისუფლება ფიქრობს, რომ ათენის რაიონში ხანძარი, რომელმაც ათეულობით ადამიანის სიცოცხლე შეიწირა არა შემთხვევით, არამედ წაკიდებით გაჩნდა.