საბერძნეთის ხელისუფლება ფიქრობს, რომ ათენის რაიონში ხანძარი, რომელმაც ათეულობით ადამიანის სიცოცხლე შეიწირა არა შემთხვევით, არამედ წაკიდებით გაჩნდა. ამის შესახებ ჟურნალისტებს შინაგან საქმეთა მინისტრის მოადგილემ, ნიკოს ტოსკასმა.

"ჩვენ გამოძიება დავიწყეთ სერიოზულ წყაროებზე დაყრდნობით", - განაცხადა მან პრესკონფერენციაზე. მან, ასევე, დაამატა, რომ ცეცხლის გავრცელებას მაღალმა ტემპერატურამ შეუწყო ხელი.

საუბარია ტყის ხანძარზე, რომელმაც ფაქტობრივად მთლიანად გაანადგურა სოფელი მატი, რომელიც ათენისგან 30 კილომეტრში მდებარეობს. დაღუპულთაგან უმეტესობამ სოფლის დატოვება ვერ მოასწრო. ისინი თავიანთ სახლებსა და მანქანებში დაიღუპნენ.

ხელისუფლების წარმომადგენელმა განაცხადა, რომ ხალხის ევაკუირება შეუძლებელი იყო, რადგან მატის გამანადგურებელი ხანძარი სულ საათ-ნახევარი გაგრძელდა. ხანძრის დღეს ქარის სიჩქარემ საათში 120 კილომეტრს მიაღწია. ბოლო რვა წლის განმავლობაში ეს იყო ყველაზე ძლიერი ქარი. ატიკის რეგიონში ერთდროულად ხანძრის 13 კერა გაჩნდა.

საბერძნეთის ტყის ხანძრებს 83 ადამიანის სიცოცხლე შეეწირა, 60 ადამიანი დაშავდა, ხოლო 25 უგზო-უკლოდაა დაკარგული. 2007 წლის შემდეგ ეს იყო ყველაზე ძლიერი ტყის ხანძარი. მაშინ პელოპონესის ნახევარკუნძულზე ათეულობით ადამიანი გარდაიცვალა.

სტიქიასთან საბრძოლველად რამდენიმე ქვეყანამ, მათ შორის, საქართველომ, საბერძნეთს დახმარება შესთავაზეს. ხუთშაბათს ათენში ძლიერი წვიმა იყო, რამაც ხანძრის ჩაქრობას ხელი შეუწყო, თუმცა, ამავე დროს, ქალაქი დაიტბორა.