აშშ-მა პრეზიდენტმა, დონალდ ტრამპმა ბოლო ტვიტით შეგვატყობინა, რომ მზადაა ევროკავშირიდან იმპორტირებულ პროდუქციაზე არსებული საბაჟო ტარიფები მოხსნას.

"მე მაქვს იდეა ორივე მხარისთვის (აშშ, ევროკავშირი) გავაუქმოთ, ყველა ტარიფი, ბარიერი და სუბსიდია. ამის შემდეგ ჩვენ გვექნება თავისუფალი ბაზარი და სამართლიანი ვაჭრობა. იმედი მაქვს, ევროკავშირი ამ წინადადებას დათანახმდება ჩვენ მზად ვართ, მაგრამ ისინი არა "

ამგვარად, დონალდ ტრამპი 25 ივლისს, ვაშინგტონში დაგეგმილ შეხვედრასაც გამოეხმაურა. პრობლემური ეკონომიკური საკითხების მოსაგვარებლად, ამერიკის დედაქალაქში ევროკომისიის პრეზიდენტი, ჟან კლოდ იუნკერი და ვაჭრობის საკითხებში ევროკომისარი სესილი მალმსტრომი გაემგზავრა. ჯერჯერობით უცნობია შედგება თუ არა შეთანხმება მხარეებს შორის.

წინა თვეების განმავლობაში, დონალდ ტრამპმა რამდენიმე მიმართულებით წამოიწყო "სავაჭრო ომი", მათ შორის, ჩინეთთანაც და ევროკავშირის ქვეყნებთან. მნიშვნელოვანი ტარიფები დაწესდება, პროდუქციის ფართო სპექტრზე, მათ შორის, აგრარულ და ინდუსტრიულ ნაწარმზეც.

Financial Time-ის ინფორმაციით, ევროპელები პრობლემის მოგვარების რამდენიმე გზას განიხილავენ. საქმე იმაშია, რომ ბევრ ევროპელ მწარმოებელს არსებული ტარიფები მნიშვნელოვნად უკარგავს ეფექტურობას, აძვირებს საქონელს და ამცირებს მოთხოვნას. მათ შორის, ყველაზე მეტად ეს საფრთხე გერმანულ ავტოწარმოებას ემუქრება. არსებული სატარიფო განაკვეთით მათი ეფექტურობა ამერიკულ ბაზაზე მნიშვნელოვნად შემცირდება.

ასევე, განიხილება მრავალმხრივი შეთანხმების მიღება, რომლითაც განულდება არსებული ტარიფები, პროდუქციის ფართო სპექტრზე. ამასთანავე, გამოცემა სკეპტიკურად აფასებს სრული და ყოვლისმომცველი თავისუფალი ვაჭრობის გაფორმების შესაძლებლობას. ამ მიმართულებით, ევროკავშირი მნიშვნელოვნად იზღუდება, ვინაიდან ასეთი ხელშეკრულების გაფორმების შემთხვევაში, ევროპული აგრომწარმოებლები კონკურენციაში შევლენ ამერიკულ აგროსექტორთან, რაც მნიშვნელოვან რისკებს შეუქმნის ევროპული პროდუქციის დომინირებას.

ჯერჯერობით უცნობია, თუ კონკრეტულად რაზე შეთანხმდებიან მხარეები, თუმცა ბოლო თვეების განმავლობაში ეს მხარეებს შორის არსებული კონფლიქტის მოგვარებისკენ გადადგმული პირველი ნაბიჯია.

იუნკერისა და ტრამპის შეხვედრას წინ უსწრებდა თავისუფალი სავაჭრო ხელშეკრულების გაფორმება ევროკავშირსა და იაპონიას შორის. შეთანხმება, დაახლოებით, 600 მილიონ ადამიანს შეეხება და მოცულობით გლობალური ეკონომიკის მესამედს შეადგენს.