17 ივლის იაპონიამ და ევროკავშირმა თავისუფალი ვაჭრობის ხელშეკრულებას მოაწერეს ხელი. აღნიშნული ხელშეკრულებით ორივე მხრიდან გაუქმდება სახელმწიფო ტარიფები ყველა სახეობის იმპორტირებულ საქონელზე. ხელშეკრულება ძალაში 2019 წელს შევა.

შეთანხმება ჯამში 600 მილიონ მოქალაქეს შეეხება და მსოფლიოს ეკონომიკის მესამედს მოიცავს. მსოფლიოში მიმდინარე ე.წ. სატარიფო ომების ფონზე, აღნიშნული ხელშეკრულება ეკონომიკურთან ერთად დიდ პოლიტიკურ მნიშვნელობასაც ატარებს და მნიშვნელოვნად ამცირებს პროტექციონიზმის საფრთხეს.

თავისუფალი სავაჭრო ხელშეკრულებით ევროკავშირში წარმოებული ისეთი პროდუქცია როგორიცაა ღვინო და ყველი გათავისუფლდება სახელმწიფო ბაჟისგან. ასევე, იაპონიაში წარმოებული მანქანები და ელექტრონიკა უფრო ხელმისაწვდომი გახდები ევროპული ბაზრისთვის.

ხელშეკრულების გაფორმებას Twitter-ის პირად გვერდზე გამოეხმაურა, ევროსაბჭოს პრეზიდენტი დონალდ ტუსკი.

"ყველაზე მასშტაბური სავაჭრო ხელშეკრულებით ჩვენ კიდევ უფრო გავამყარეთ ურთიერთობები. ევროკავშირისა და იაპონიის ურთიერთობა არასდროს ყოფილა ესეთი ძლიერი. მიუხედავად გეოგრაფიული დაშორებისა, ჩვენ საერთო ღირებულებებს ვიზიარებთ", - აღნიშნა მან.

2017 წელს იაპონიასა და ევროკავშირს შორის საერთო ვაჭრობის ჯამურმა მოცულობამ $152 მილიარდი შეადგინა. ხელშეკრულების ამოქმედების შემდეგ, სავარაუდოდ, აღნიშნული მაჩვენებელი მნიშვნელოვნად გაიზრდება.

აღნიშნული ხელშეკრულების ეკონომიკურ ღირებულებაზე უფრო მნიშვნელოვანი შეიძლება მისი პოლიტიკური მნიშვნელობა აღმოჩნდეს. მსოფლიოში მიმდინარე სავაჭრო ომის ფონზე ეს შეთანხმება შეიძლება დადებით სიგნალად იქცეს დანარჩენი მსოფლიოსთვის.

წინა თვეში დონალდ ტრამპმა მიიღო გადაწყვეტილება დაეწესებინა ტარიფები ევროკავშირიდან და ჩინეთიდან შემოსულ საქონელზე, რაც მნიშვნელოვან რისკებს უქმნის გლობალურ ეკონომიკას. ტრამპის გადაწყვეტილებით, წინა წელს აშშ ასევე გამოვიდა წყნარი ოკეანის ქვეყნების სავაჭრო შეთანხმებიდანაც.

დღეს იაპონია და ევროკავშირი ამერიკის ყველაზე მსხვილი სავაჭრო პარტნიორები არიან. წინა თვეში ევროკავშირის სავაჭრო კომისიის ხელმძღვანელმა სესილ მალსტრომმა განაცხადა, რომ ევროკავშირს სურს შეამციროს ან სულაც გააუქმოს სახელმწიფო ტარიფები ამერიკიდან იმპორტირებულ საქონელზე. თუმცა, მისი თქმით, დონალდ ტრამპმა მოლაპარაკებას "კარის გახურვა" არჩია.

საშუალოდ, ევროკავშირში წარმოებულ საქონელი იაპონიაში 1,6 პროცენტით იბეგრებოდა, რაც ერთ-ერთ ყველაზე დაბალ ნიშნულია. იაპონური პროდუქცია ევროკავშირში დაახლოებით 2,9 იბერგრებოდა.