"ასეთ რამეებზე წინასწარ არ კეთდება განცხადება, რაკეტები სათქმელს თავად იტყვიან", — ამის შესახებ უკრაინის პრეზიდენტმა ვოლოდიმირ ზელენსკიმ მას შემდეგ განაცხადა, რაც მედიაში გავრცელდა ინფორმაცია, რომ ბაიდენის ადმინისტრაციამ კიევს ამერიკული წარმოების რაკეტებით რუსეთის ტერიტორიის სიღრმეში დარტყმების განხორციელების უფლება მისცა.

მისი თქმით, უკრაინის გამარჯვების გეგმა, რომელიც დასავლელ პარტნიორებს რამდენიმე ხნის წინ წარუდგინეს, სხვა საკითხებთან ერთად, შეიცავს პუნქტს უკრაინის არმიის შორ მანძილზე მოქმედების შესახებ.

"დღეს მედიაში ბევრს საუბრობენ იმის შესახებ, რომ ჩვენ მივიღეთ გარკვეული მოქმედებების ნებართვა, მაგრამ დარტყმები სიტყვებით არ ხორციელდება. ასეთი რამეების შესახებ წინასწარ არ კეთდება განცხადება. რაკეტები სათქმელს თავად იტყვიან. ნამდვილად ისაუბრებენ. დიდება უკრაინას", – განაცხადა ზელენსკიმ ყოველდღიური ვიდეომიმართვისას.