ისრაელის საზოგადოებრივი მაუწყებლის, KAN-ის ინფორმაციით, პალესტინური ტერორისტული დაჯგუფება ჰამასის მაღალჩინოსნები, კატარის მიერ მათი ქვეყნიდან გაძევების შემდეგ, ბოლო რამდენიმე დღეა, რაც თურქეთში იმყოფებიან.

ამერიკულმა წყარომ თვის დასაწყისში დაადასტურა, რომ კატარის ხელისუფლებამ მიიღო გადაწყვეტილება, რომ ჰამასის წარმომადგენლები ქვეყნის ტერიტორიიდან გაეძევებინა.

ცოტა ხნის წინ, Reuters-იც წერდა, რომ აშშ-მ ოფიციალურ დოჰაზე ზეწოლა გაზარდა, რათა ამ გადაწყვეტილებამდე მიეყვანა — მას შემდეგ, რაც ჰამასმა ბოლო სამშვიდობო შეთავაზება უარყო.

ამავდროულად, თურქეთმა ომის მიმდინარეობისას ჰამასისადმი თანაგრძნობა არაერთხელ გამოხატა. აგვისტოს დასაწყისში თურქეთის პრეზიდენტმა რეჯეფ თაიფ ერდოღანმა ჰამასის პოლიტიკური ბიუროს ხელმძღვანელის, ისმაილ ჰანიეს, ლიკვიდაციასთან დაკავშირებით გლოვის დღე გამოაცხადა — თელ-ავივში თურქეთის საელჩომ დროშები დაუშვა.

"ვერავინ გვაიძულებს, ჰამასი ტერორისტულ ორგანიზაციად გამოვაცხადოთ. თურქეთი ქვეყანაა, რომელიც ჰამასის ლიდერებთან ღიად საუბრობს და მათ მტკიცედ უჭერს მხარს", — განაცხადა ერდოღანმა სტამბულში გამოსვლისას.