გამოცემა რადიო თავისუფლების (Radio Free Europe/Radio Liberty) ცნობით, ამერიკულმა კომპანია Apple-მა მათ შეატყობინა, რომ რუსული მედიის მარეგულირებელი ორგანოს მოთხოვნით, რუსეთში App Store-იდან მათი აპლიკაცია წაიშალა.

Apple-ის მიერ წაშლილი რადიო თავისუფლების აპლიკაცია რუსულ რედაქციას ეკუთვნის და მის ვებსაიტზე გამოცემის რეგიონული პროექტები Siberia.Realities და North.Realities არის განთავსებული.

გამოცემის ცნობით, რუსეთის საინფორმაციო ტექნოლოგიებისა და მასობრივი კომუნიკაციების ზედამხედველობის ფედერალურმა სამსახურმა Apple-ს შეატყობინა, რომ RFE/RL-ს რუსული ბიუროს აპლიკაცია შეიცავს მასალებს ისეთი ორგანიზაციისგან, რომლის საქმიანობაც რუსეთში "არასასურველად" არის გამოცხადებული.

Apple-მა მანამდე App Store-იდან რადიო თავისუფლების ყირგიზული ბიუროსა და გამოცემის მიერ მართული რუსულენოვანი სატელევიზიო და ციფრული ქსელის Current Time-ის აპლიკაციაც აიღო.

აპლიკაცია სხვა ქვეყნების App Store-ებში კვლავ ხელმისაწვდომია.

რუსეთმა რადიო თავისუფლება "არასასურველ ორგანიზაციათა" სიაში თებერვალში შეიყვანა. გამოცემის პრეზიდენტის სტივენ კაპუსის თქმით, ეს გადაწყვეტილება "კიდევ ერთი მაგალითია იმის, თუ როგორ მიიჩნევს რუსეთის მთავრობა ამბების გულწრფელ გაშუქებას ეგზისტენციალურ საფრთხედ".